盤點80後無綫十大神劇

一套劇集要稱得上係「神級」，當然係要有話題性，而且令人印象深刻，無綫曾經出產過唔少膾炙人口嘅劇集，近日有網友就盤點陪住80後成長的無綫十大神劇，仲寫晒入選原因。

首當其衝有1997年嘅《美味天王》，由歐陽震華（Bobby）、關詠荷呢個TVB金牌情侶檔主演，呢套劇成功入選係因為有「超大卡士、 超級大堆頭」 ，除咗兩位主角外，配角亦係粒粒皆星，包括資深演員秦沛、永遠嘅開心果沈殿霞（肥姐）、型男古天樂等，有網友話當年「每日唔睇都瞓唔着！」

由94年起播足四年半嘅處境劇《真情》亦成功入選，因為「笑聲笑聲滿載溫馨」，真係陪住好多網友一齊長大；而拍足四輯嘅《刑事偵緝檔案》都係網友心水神劇，呢套係TVB史上首次出現同一系列嘅劇集喺一年之內播出兩輯，同樣拍足四輯嘅《陀槍師姐》亦榜上有名，足見查案類劇集真係深受歡迎，喺《陀槍師姐II》入面，駱達華飾演面具色魔翁文成，都令唔少網友覺得心寒。

另外，有唔少網友都好掛住曾經獲三屆視帝嘅羅嘉良，佢主演嘅《難兄難弟》同《天地豪情》都係十大神劇之一；至於2000年嘅《十月初五的月光》亦被網友捧為經典，近日終於拍成電影版，好多網友都話好掛住「初哥哥」呢個經典角色。由網絡男神子華主演嘅《男親女愛》及喺2002年創下TVB史上收視最高嘅《戇夫成龍》則係上榜愛情劇代表。

稍為爆冷嘅有2008年嘅懸疑劇《與敵同行》，雖然劇集收視未有創下新高，但勝在題材夠爆夠複雜，唔少網友更話希望有續集推出。

唔知以上十大又啱唔啱你心水呢？

網民有話說：

spanXXXX: 羅嘉良果（嗰）堆大片都好野（嘢）黎（嚟），流金歲月。

jeijXXXX: 《烈火雄心》點會冇？

燮中XXXX: 《錦繡良緣》鄭中基同梅小惠好正！

陳XXXX: 《十月初五的月光》初哥哥！