天生戲子　田蕊妮登上視后之路

亞視出身的田蕊妮過檔無綫後演技大爆發，每套劇集都擔正女主角，更憑《巨輪》封雙料視后。她年僅15歲便參加歌唱比賽《未來偶像爭霸戰》入行，無心插柳下簽約亞視踏上演藝路，鍛煉成好戲之人。眼見亞視的風風雨雨，她憶起當年在舊東家的歷練，點滴在心頭！

15歲入行

保養得宜的田蕊妮原來已37歲，轉眼已在圈中度過了21個寒暑。當年只有15歲的阿田一心參加歌唱比賽做歌手，豈料命運巨輪 將她推上演藝路，在亞視演盡令人印象深刻的角色，代表作有《縱橫四海》的阿Cat、《萬家燈火》的貴妹，令她赫然自覺天生 是「戲子」！雖然已離巢，但昔日在亞視無憂無慮的日子仍令她回味。阿田由亞視一手湊大，眼見舊東家現時風雨飄搖，自然 感到忐忑，飲水思源的她回味昔日在亞視浸淫的時光，感激「伯樂」將寂寂無聞的小妮子打造成人人稱羨的視后。

人工七千似百萬富翁

阿田中學時代已入行，直言當年返亞視猶如去玩，工作量少，零用錢卻冠絕朋輩：「嗰時讀書一星期只得150蚊零用錢，簽約後有7,000蚊人工，覺得自己發咗達，好似百萬富翁！其他同學一星期可能只食到一餐麥當勞，但我就日日食都得，呢種感覺真係好開心！我又唔使點做嘢，淨係星期六、日要做個Live嘅音樂節目，或者出去宣傳國際台，有次中秋節仲梳古裝扮嫦娥！」雖然輕輕鬆鬆又一日，可惜發展空間有限，眼見身邊好友逐一負笈海外，阿田亦萌生去意：「嗰個年代喺亞視做歌手冇乜發展，開始覺得日日喺度蹉跎歲月唔係辦法，諗住完咗份約就去外國讀書，實現第二個夢想。」

特派採訪嚇破膽

夢想成真前，阿田當然要面對現實繼續開工，迎面而來的首個挑戰竟是《今日睇真D》，她說：「第一日開工就派我去突發組，化定妝等接電話睇有冇突發嘢，之後收到電話，原來係去紙盒藏屍案嗰度！」年僅17歲的她被委派到案發現場做報道，感受尤深：「雖然條屍已經清走咗，但我到依家都仲記得嗰陣味，好似死咗一千隻老鼠咁，嗰時嚇到我即刻爆喊！」首次出更已出師不利，嚇破膽的她決定辭演《睇真D》，輾轉下被安排去拍劇，為其視后之路奠定基礎。

「發生咩事都要做埋呢場戲」

當年處女下海的阿田對演戲零概念，亞視幕後員工的「特別指導」令她更為徬徨：「導演同前輩未必會用友善同禮貌嘅方法教你，你做得差，佢哋唔會氹你，一嚟就『問候』！當時我只係個細路女，覺得『我唔識喎，梗係唔知啦！』第一日開工已經勁驚、想喊！」她本來無心演戲，但在充滿熱誠的工作人員感染下，開始享受演戲帶來的樂趣：「亞視嗰時每個人都好弗，無論你拍咩戲，要喊定要感情戲，Camera Man都一定捕捉到嗰刻，只有演員唔得，佢哋唔會唔得，可能受拍攝氣氛影響，令我呢個新人都分外投入。」亞視員工的專業表現更成為其典範：「亞視第一次裁員嗰陣我拍緊《穆桂英》，導演接到電話被裁員，但佢冇即刻走，仲拍埋嗰日場戲！佢用身教話我知，無論發生咩事都要做埋呢場戲。」

原來我天生係一個演員

無心插柳柳成蔭，阿田似是命中注定踏上演藝之路，她說：「我拍完《穆桂英》已經搵晒學校去加拿大，當時仲有大半年就完約，突然收到監製鄭偉文電話，想搵我拍《縱橫四海》，因為原本個演員撞咗期，得我得閒。」就是因為一句「得閒」，阿田 接拍令她一演成名的《縱》劇，與多位好戲之人切磋演技，從而發掘其演戲細胞：「Deanie姐（葉德嫻）係個超級認真嘅演員，開工永遠都有個File。嗰時係飛紙仔，佢可能覺得場戲寫得麻麻，就喺個File拎咗啲『功課』出嚟同我講：『新抱仔，依家你發現咗老公原來一直都唔鍾意你，鍾意第二個女人，依家演你同奶奶呢場戲，如果我咁問，你會講啲乜？』喺冇劇本情況下，我哋對吓對吓就對咗場戲出嚟，嗰時嘅感覺係：『原來我天生係一個演員！』」阿田自此迷上演戲，更享受投入角色時的安全感。

阿田自言非常幸運，在演藝路上遇到多位好前輩，先有Deanie姐令她開竅，後有BoBo姐（馮寶寶）用眼神感染她：「最後一套 劇《萬家燈火》係同BoBo姐做兩母女，戲內講我由細到大都誤會佢只錫家姐唔錫我，嗰場戲講我終於將咁多年嘅冤屈、對阿媽嘅誤解講晒出嚟！BoBo姐坐喺隔籬，我睇到佢望住我嘅眼神係好愛我，亦好痛，跟住我哋喊到個衫領位濕晒！佢當時望住我嘅眼神，我諗除咗親生阿媽外，只有BoBo姐畀到我。」

慨嘆舊東家淪陷

經過亞視的十年孕育後，羽翼漸長的阿田在2003年離巢外闖，先後兩次獲得香港電影金像獎「最佳女配角」提名，前年更憑《 巨輪》成為無綫雙料視后。雖然事業屢創高峰，但亞視的一點一滴仍在心頭，阿田慨嘆往事只能回味：「感覺以前嘅亞視真係呢行嘅一分子，就算收視未如理想，或者回報未必同付出相對，起碼做出嚟嘅嘢有人Respect（尊重）。」眼見舊東家陷入財困，更拖欠員工薪金，她十分感慨：「戥員工慘，佢哋用勞力同熱誠工作，可惜因為股東問題冇糧出。」

戲如人生：冇可能永遠站在高峰

入行21載的阿田可謂名利雙收，更已封后，不少藝人奪獎後都會定下新目標，力求再闖高峰，阿田卻早已看破世事，無欲無求：「以前做完戲好想有人讚，人大咗先知咁諗一來唔會做到好戲，二來覺得做到喜歡嘅工作已經好幸運，仲要求乜嘢？依家拍劇唔只為滿足自己，而係收到角色就想演好佢。」所謂「戲如人生」，她不諱言會「以退為進」：「演戲好似人生咁，唔會去到某個點就完，除非有日我唔做，但依家一路行緊，進步定退步唔會知，即使退步亦唔等於係差，人冇可能永遠站喺高峰，有時要退一退先會反彈得更好。我唔會因為個獎而有壓力，亦唔會有咩目標，呢樣唔係我追求嘅嘢。」

後記

霸氣女王親力親為田蕊妮貴為視后，理應有一大班助手跟出跟入，但訪問當天身邊只有一名助手，化妝也是自己搞掂，排場對阿田來說根本不切實際。提起在亞視發生的趣事，阿田不時手舞足蹈，更變身「大笑姑婆」，她不但好戲，更是講古能手！