陳詩雅撈過界循序漸演

Angelababy師妹陳詩雅（Sarah）擔任模特兒多年，為免觀眾當她是一般的模特兒，她不斷自我增值，還跟張達明學演技，盼以踏實的步伐向演藝界進發！

入行辛酸史

現年27歲的陳詩雅（Sarah）完成學業後，一直擔任Model工作，問到會否怕入行太遲？她說：「我好需要安全感，好多嘢要好肯定先會做！我都係做過Model先知道自己原來咁鍾意演出，有心唔怕遲啦！」起初入行只為留下倩影的她，沒想過工作不斷，接拍廣告多不勝數，餅店、銀行、飲品……數得出的都有，但最難忘的竟然是一個朱古力廣告：「一開始都幾期待o架，因為我好鍾意食朱古力，但當你不停食，食咗三、四十條嗰陣，仲要表現到好想食、好好味咁，真係好難！拍完就覺得呢個係一個好好嘅經歷，可以比我更加了解到呢行嘅辛酸，其他人唔會明。」

外界無不認為模特兒像個花瓶，只靠外貌賺錢，但Sarah認為只是誤解：「其實喺呢行如果唔努力或者冇內涵嘅話，係好難發展得耐，唔係旁人諗得咁簡單！」

搵張達明教做戲

不喜歡一步登天的Sarah，從不隨便出席飯局及派對，堅持以正途靠努力闖出一片天。為了不斷進步，她於工作期間亦不忘自我增值：「我好鍾意挑戰自己，拍過好多唔同類型嘅廣告，儲埋儲埋好多拍攝經驗，新一年好想試吓新嘅事，突破自己！因為一直想向電影方面發展，所以呢一年嚟上咗張達明老師嘅演技班，學吓演技。」若然從不走「捷徑」，會否怕人氣不及出盡奇招的模，Sarah說：「我唔恨呢啲！因為只係海市蜃樓，咁樣係可以好快出名，但啲人都好會快忘記你！你要不斷進步同努力，人哋睇得到先會記入心！」

背負「Baby師妹」之名難免有壓力，Sarah亦坦言起初承受過許多壓力，搞到精神繃緊，但後來發覺一切只視乎自己的想法：「每個人都有壓力，只係睇你點樣處理，我就寧願同叻啲嘅人一齊工作，咁樣總好過你自己係最叻嗰個，因為咁先會有進步，當佢哋係自己嘅學習對象，壓力就冇以前咁大！」

愛運動變長處

除了喜歡表演外，Sarah亦熱愛運動，跑步、籃球、游水樣樣精，運動健將是也，她笑說：「如果嗰時冇做咁多運動，可能唔會生到咁高、隻腳咁長，咁就可能做唔到Model，入唔到行！（手長腳長佔優？）我諗點都有啲優勢嘅！因為如果角色本身係叻某一樣運動或者要落水嘅話，我起碼都有信心駕馭到。」