最新神曲超中Point！失戀必聽

各位，有無統計過一生人畀人飛過幾多次，又飛過幾多人？咁你哋又有無數過，自己一生人之中，愛過幾多個唔應該愛嘅人？咁你哋又試過幾多次，為咗分手喪喊甚至想做傻事？如果你嘅答案係多過一次或以上嘅，咁恭喜你，呢篇網民熱話啱晒你睇，因為我哋要激推農夫嘅新歌《好彩分手》。

出名食腦嘅農夫，由於世事都被佢哋看透，所以佢哋寫咗呢首質爆「警世語句」嘅歌詞嚟度勉勵唔小心遇着衰人嘅年青人，或者仲未到達化境嘅成年人、中年人甚至......

既然講到咁神，無理由唔晒冷吓啲歌詞o架，好！等《東網》先以數白檻嘅方式為大家細數一吓啦：「佢冇理過你感受　佢洗你錢　佢cut你線　佢落你面　你對佢仁至義盡啦　佢仲想你點？記住今日佢飛你係佢唔識貨　呢種人你咪當從來無識過　你只係信錯衰人一個　咪唔信愛情係會有好結果」、「佢仲喺instagram處寫條文　你話佢扮咩　扮咩受害者　佢話佢比你仲傷　其實你係你畀佢中傷　呢啲咪躺着都要中槍　邊有人分手o趙完仲唱 人生流流長　總會遇到幾條......」

「講大話佢太擅長　朋友你太善良　你點對人　唔等於人哋會點對你　學識呢個道理獲益嘅係你自己　或者呢段感情係有啲苦澀味　不過你應該慶幸　呢個人冇同你走到結尾」、「根本佢就係有史以嚟　呢個人淨係識愛自己　分咗手仲要講你是非　邊有人一衰衰到貼地　人生流流長　總有人唔使原諒」

點呀？齋睇係咪都覺得學到好多嘢呀？係咪覺得好多道理你都明、你都知、你都經歷過，只係你唔願接受同唔識執行？無錯，分手唔代表就係世界末日、唔代表你就係一文不值，可以係對方唔值得你去愛，既然係咁，又何必傷心？因為根本對方無資格。

由於《好彩分手》嘅歌詞實在塞咗錢落太多太多「戀愛大過天」嘅人個袋，所以一推出即時掀起網民熱議，有網民勁讚中Point，有網民覺得首歌好似為佢度身訂造咁，亦有人覺得聽完之後舒服晒。咁大家以後再不幸經歷分手嘅時候，除咗可以聽分手神曲《活得比你好》外，仲可以聽埋呢首，咁就包你分手都可以充滿正能量！去卡啦OK點啲唱到爆喊嘅歌嚟度治療失戀？Out晒啦！

網民有話兒：

SliXX XXwin：正到冇朋友

MiXXXXX Yip： Mute位好正

Ying XXXXX Lee：真係好正，完全好似唱比（畀）我聽咁......啲內容仲要咁吻（脗）合，簡直就好似為我剛剛呢段感情而寫咁......

CXXXX Leung：極有鼓勵性既（嘅）勵志歌

YI XXX：舒服晒

附上《好彩分手》MV Link：