亞視欠供強積金　林祖輝：只會更離譜

林祖輝出席活動，他透露會將舊衫捐去慈善機構或送給家傭。雖然普遍女仔比男仔多衫，但近年太太姚嘉妮已比以前少買衫。他又大爆老婆除拍戲外，還有教人跳舞，所以身材愈跳愈Fit，很多衫都不啱身。問到可有心痛太太過瘦？祖輝謂：「又唔會，因為佢跳舞跳得好開心，人都精神咗好多。」

另外，問到亞視繼欠薪後，現又欠為員工供兩個月強積金，可會覺得很離譜？祖輝坦言：「冇離譜只會更離譜，由亞視欠薪可以用『雞券』代替到向財務公司借錢嘅方法，咁諗唔到（嘅方法）亞視都諗到，呢間公司有咩唔離譜架？其實亞視入面有好多精英，只係欠咗個好老闆，加上行頭太窄，如果有10間電視台，啲人都唔使冇人工都繼續做住，因為好難搵到出路，個個都係專業人士，叫人無端端點轉行？希望亞視快啲有定案，唔好再拖。」