男神王宗堯溝女都畀人「撬長腳」？

王宗堯、黃芷晴及梁小冰等到灣仔會展出席一個周年晚宴，會與陳詩慧表演唱歌的宗堯就表示剛做車主：「同事幫我去攞車，呢幾日都好忙，搞啲手續。最開心係可以車阿媽、車阿嫲。（唔係車女友？）我遲啲會有，有會話畀大家聽！」但他就坦言未有對象：「努力啲囉！依家啲女仔好犀利，好快就畀人搶咗。（畀人搶走過？）曾經覺得個女仔幾好，不如認識吓，跟住食過一次飯之後，自己太忙，隔咗一個月都冇就畀人搶走咗。」問對象是圈內還是圈外人，他就指一半半：「其實我都好主動o架喇！我都要瞓覺o架！冇理由唔熟都叫佢嚟我屋企瞓覺掛？」更指自己會修正策略，下次會直接問對方會否跟自己拍拖。

拍完劇請屋企人旅行

而正趕拍大陸劇《只有情永在》的芷晴就特意跟劇組請假赴會：「日日都開工，因為有成60集咁多。（咁好好Pay！）又唔好咁講！（逐集計喎！）簽約嘅！」問她賺到幾多位數，她笑謂：「要問番公司，真係唔知！」不過就坦言拍攝完畢會請屋企人去旅行：「其實我係去日本，但係我阿媽就唔想，驚輻射。但啱啱問佢一唔一齊去日本，佢就話我拍埋套劇先。」問她要拍到幾時，她就表示要拍到5月初：「我生日都係5月頭，可能要喺廣州過。」