東網獨家：連詩雅自爆捱窮史！三餐食麵包

明星藝人在鎂光燈下光鮮亮麗，但其實台下付出多少，的確有苦自己知。「長腿女神」連詩雅（Shiga）入行4年，有份在電影《喜愛夜蒲》系列中演出，2011年同時憑此片榮獲第31屆香港電影金像獎最佳新演員提名，亦在各大音樂頒獎禮上獲得漂亮的成績單。熱愛演藝事業的Shiga在圈中愈行愈順，她坦言去年是豐收年，出碟之餘更「處女下海」，有份做大型音樂騷。

捱過窮做「月光族」

其實Shiga就算拍完《喜》片而人氣急升，但頭兩年出道依然冇錢賺，更試過日以繼夜三餐捱麵包！Shiga之所以慳家兼住過劏房，皆因當初捱過窮，入行後的她與眾多長期糧尾的打工仔一樣，做過「月光族」，她說：「頭嗰兩年完全冇賺錢，所以我會特別容易滿足。永遠人哋睇你就最風光，你一個月肯定賺幾廿萬啦，嘩，我都想呀！我試過一日三餐都成問題，你知打工仔月頭最風光，月尾最坎坷，我完全經歷過。」她更指支出要計過度過，就算手上一袋二袋，Shiga都要放下歌手身段，照逼巴士、港鐵，兼且三餐以麵包醫肚：「試過一日三餐我剩係食麵包。（入不敷支？）可以咪慳番，食麵包都飽，起碼唔會餓死先。」餓唔死的Shiga更坦言拍過電影都仍然要慳住使，最緊要Enjoy自己的事業！

度過最艱辛的兩年，終於向公司還清債項的Shiga自言搣甩負資產重見光明，不用日日捱麵包，她說：「以前借公司錢，還咗錢嗰一刻係人生轉捩點，好似負資產嘅人，突然變正資產，好大喜悅！」

事業愛情兩得意

單親家庭長大的Shiga相當生性，自父母離婚後就獨力賺錢，從未用過媽媽的一分一毫，自己零用錢自己打工賺，免得媽媽操心。她最想媽媽退休，自己孭起養家的責任，果然是一等一的孝順女！問到Shiga是否愛情事業兩得意，去年年尾大方承認與圈外有米男友Anthony蜜運的她亦笑言：「OK嘅，生活上好多嘢漸漸好，工作上可以好好多，好多嘢想做做到。」