台灣喜事　張震B女腳頭好名利雙收

前年年底與拍拖4年的助手女友莊雯如拉埋天窗的張震，婚後即努力「造人」，結果結婚未夠一年，去年10月就爆出張震老婆已懷孕3個月。

直至昨日上午，張震率先在微博上載BB腳印報喜，升呢做老竇的他，更公布老婆平安誕下小千金，並興奮留言：「新成員報到！」莊雯如亦有在網上開心Share女兒靚相，見BB戴着粉紅色帽仔，睡覺時舉起一雙小手，面珠紅粉緋緋、五官標緻，盡顯爸媽良好基因！張震哥哥張翰對自己榮升「大伯」亦相當興奮。

女兒腳頭好

張震事後透過經理人與大家分享初為人父的喜悅：「覺得很不可思議，很開心，母女都很健康，謝謝大家關心。」其實張家小千金未出世已經好好腳頭，去年10月張震先入圍金馬獎角逐最佳男主角，之後又在今年年卅晚的央視春晚表演古琴兼耍八極拳，被讚是全晚最具亮點的表演之一，有姿勢有實際。似乎B女旺爸之餘，更令張震名氣財富滾滾來！

出身演藝世家的張震，父親張國柱是台灣資深演員，縱橫影壇逾30年，哥哥張翰演而優則導。過往張震拍戲時，更是好學不倦，難怪被冠以「學霸」的美譽！未知張震會否想囡囡繼承衣缽，裁培她做女版張震呢？

羊年忙賺奶粉錢

另外，好爸爸張震羊年亦會密密做，賺奶粉錢養家，張震所屬公司透露張震先要忙宣傳新片，兼洽談多個劇本：「有好多劇本睇緊，嚟緊要宣傳新戲《道士下山》、《赤道》、《聶隱娘》。（吳京搵佢拍戲？）都好想同吳京老師合作，仲有好多嘢傾緊。」