林家棟爆響口王菀之攞硬金像獎

藝人林家棟出席《香港專業電影攝影師學會HKSC週年晚宴》，獲頒專業眼中「最具魅力男演員獎」，而資深電影人吳思遠則頒發年度「最傑出攝影獎」給伍啟銘。

導演劉偉強讚家棟多年的努力值得嘉許：「由2000年已經開始同佢合作，佢默默耕耘咗好多年，我哋唔需要誇張、搏出位嘅演員，我哋揀得好獨裁、冇普選，我哋係選最專業嘅演員。」

自知唔係靠個樣

家棟笑言可能自己捱得而獲獎：「可能佢哋都知我咁多年，喺電影幕前幕後都諗好多、創作好多，唔單單係自己演出，包括製作機會、推動，我諗嗰份力量推動到大家，自從《打擂台》後呢幾年，大家成日話要做番多少少香港電影，畀多啲機會新人同發掘多啲冇咁活躍嘅前輩。」問是否外貌魅力而獲獎？他笑說：「一定唔係，講樣排隊都未到我，我自己知嘅。」

拍砵蘭街愛情故事

他指下半月中小企本地製作及新人會增加，有意明年開拍兩部電影，分別是溫情戲及愛情喜劇：「嚟緊希望搞個砵蘭街嘅戲，因為廿年前嗰度係個聖地，依家退咗色，所以想搞個喜劇。（有關性題材？）唔會……係唔會唔搞，其實係講一個愛情故事。（黃色愛故事？）有顏色嘅愛情故事囉，但一定唔係三級嘅。（咩色？）係唔好色嘅故事。」

至於女主角方面，家棟與編劇研究過，希望邀得王菀之演出：「我絕對唔係要佢做番之前嘅嘢，我哋唔需要佢露，係浪漫愛情片，當然有啲投資方想我去做。」問是否睇好王菀之贏金像獎？他說：「新人獎機會好大，但三個Quota（配額）畀佢攞咗，我驚分薄咗少少，我唔敢講邊套攞，但正常係《金雞SSS》。（女配呢？）女配都有競爭，所以我都唔敢講。」而他目前正埋首林德信主演的新片《死開啲啦》。