早前張家輝突然「自爆」與張學友有兄弟關係，基於兩人唔止生得似樣，又有同樣姓氏，令唔少人信以為真！及後，網民更不時討論呢兩位紅星嘅淵源，未料到近日突然殺出一個「程咬金」，打破兩人似樣嘅關係，佢就係影帝劉青雲！有內地網民將張學友與劉青雲傻傻分不清，更誤認劉青雲為張學友，乜佢哋兩個真係好似樣咩？

事緣，有內地網友於討論區上載相片，興奮表示喺上海街頭偶遇「張學友夫婦」，仲大讚學友嫂有一種「說不出的親近感」。但細心一睇，相中兩人雖然戴上口罩，但點睇都似係「劉青雲夫婦」而非「張學友夫婦」！講到兩人嘅共通點，應該係大家都同樣係男人，及有鮮明嘅五官。故此，有網民百思不得其解，仲問：「唔通張學友曬黑咗？」

基於呢件「點錯相」事件實在太好笑，話題好快就傳到嚟香港。而本港嘅網民更將此事與近日同類撞面事件混為一談，仲話蔡思貝同木村拓哉就難認啫，乜劉青雲同張學友好難認咩？如果撞着鍾嘉欣同吳尊，或者胡鴻鈞同陳柏宇，又點算？

網民有話兒：

Cxxx Yxx Lxxxx：張學友又唔應人喇，叫佢又唔應，同杜德偉一樣。

Hx_xx：劉青雲要喊出嚟..

Gxxx Cxxx：呢個明明就係杜德偉 又唔睬人

Txxxxxxxx Pxx Hxx Kxx：張學友曬黑咗就唔理粉絲了