網民熱話：真性情梁嘉琪　上位靠自然

為求演藝事業更上一層樓，唔少靚女藝人都唔介意做「醜女」，好似何傲兒同湯盈盈咁，平時以索女形象示人，一變醜即令人眼前一「亮」之餘，亦夠晒破格！有人靠「醜」出位，但亦有人以「自然」取勝，講緊嘅係33歲藝人梁嘉琪！

梁嘉琪近日拍住金牌司儀鄭丹瑞（旦哥）主持無綫健康資訊節目《你健康嗎？》，憑住率直生鬼嘅主持技巧，令人留下深刻印象！其實嘉琪之前同李佳芯、麥美恩等主持《學是學非》已經好受歡迎，佢更因為喺節目中參與過唔少科學實驗，而獲封「危險實驗女皇」！嘉琪唔單止做主持嘅時候夠真，做嘉賓同樣直腸直肚，有網民更表示因為見到嘉琪上《千奇百趣》同森美互寸而鍾意佢！

演藝學院出身嘅梁嘉琪，未畢業已被有線電視羅致做娛樂主播，佢更因主持《怪談》而一「喊」成名，足見佢完全唔介意喺鏡頭前展露真性情！2007年加入無綫後，佢演技大爆發，演過《學警狙擊》嘅警員「藥煲」、《回到三國》嘅諸葛亮夫人「黃月英」、《金枝慾孽貳》癲喪嘅若葵、《愛我請留言》嘅朱古力店經理「宋柳娟」以及《老表，你好hea！》嘅長腿秘書「邵寶高」等。雖然每個角色性格大不同，巴喳嘅有、賢淑嘅又有，但係嘉琪一樣演繹得咁好，所以網民大讚佢可塑性夠高，演得又放，不論演「傻大姐」定係「寸嘴港女」都入型入格！

網民有話說

全體頭盔術：睇足十一年，由有線主播到怪談，到藥煲，女拳，黃月英，到學是學非同宋柳娟

龍躉村姑：無諗過睇《千奇百趣》竟然鍾意咗梁嘉琪，見佢同森美鬥串（寸）真係好搞笑

雲加雲雲加：有線時期已經高質

胡迪與加菲：好鍾意佢係愛我請留言個角色

Captain_HK：依種女仔有時傻傻更更都幾搞笑

小提琴大禮堂：好放好自然，香港冇咩呢類型嘅藝人，大部分都扮嘢扮花瓶