楊小娟恨生第二胎：想要個女陪我行街

呂良偉及太太楊小娟一同出席慈善晚宴，問到復活節會否外遊，呂良偉表示希望帶兒子接觸大自然。問到平日是否常帶兒子外出，他說：「有，會帶佢去游水，去海灘。（仔仔依家13歲，有冇踏入青春期，開始反叛？）未見，仲愈嚟愈乖，我尋日仲讚佢。（佢做咗乜？）我之前去咗廈門拍劇三個月，佢陪住媽咪。我啱啱尋日先返，暫時唔使再飛，可以休息吓。（仔仔見到爸爸最開心？）我哋每日都視頻，好方便。」

而提到前港姐冠軍翁嘉穗相隔15年再次懷孕，問小娟有沒有興趣再生小朋友，她說：「有梗係好，我好想。不過呢啲要順其自然，我個仔都鍾意。我年紀都唔係咁大，仲可以生。」提到呂良偉常離港工作，是否很難夾時間，他即說：「唔關事，呢啲順其自然。（萬一有咗，要多啲留喺香港？）到時自然有時間，順其自然。」小娟續說：「我啲朋友叫我人工受孕，不過我好抗拒，自然好啲。我一直都好恨生女。（有冇請教啲朋友？）有，佢哋都係叫我放鬆，唔好咁緊張。我個仔一啲都唔貪靚，叫佢去買衫都唔肯，日日都着校服，覺得舒服方便，可能佢第時鍾意女仔嗰陣先會注重儀容。我想要個女陪我行街。」