林海峰現身送驚喜　幸運兒冇反應？

藝人林海峰現身連鎖快餐店為3月幸運顧客舉辦的驚喜生日派對，他表示以往從未參與或成為派對主角，並笑指幸運兒見到他時起初冇乜反應：「佢唔似做戲咁大反應會尖叫，佢冇乜反應，可能估唔到有surprise，不過佢後來好激動，掩蓋唔到內心。」

問到會否給太太驚喜，他笑說：「未做老婆前會（畀驚喜），結婚之後籌備緊。（籌備到幾時？）不斷籌備緊未實行，未係太太嗰陣即刻做到。」他表示驚喜不一定要在周年紀念等特別日子進行，並笑言：「可能今日早啲返已經叫驚喜㗎喇！」

笑太太鍾意平淡

再問太太是否喜愛驚喜，他又笑指確信每個人即使口說不用驚喜，但面對驚喜時都會高興，所以直指不會理對方感受，搞了驚喜再算。問到太太要求是否很高，他表示：「佢鍾意平淡，如果唔係唔會嫁畀我啦！」

他又指一路有籌備再搞棟篤笑，但大前提是要給予觀眾驚喜：「有好多嘢籌備，除咗要睇有冇期，仲要睇我有冇咁多嘢想講。」