吳母留院：吳若希心痛「反應冇尋日咁大」

吳若希（Jinny）媽咪日前炒單車爆頭入院，Jinny與好友Kellyjackie（KJ）約在下午五時抵醫院探病，而Jinny母親的男友人約在十五分鐘後到達。Jinny約在七時離開，她接受訪問時表示：「媽咪都係半昏迷半醒狀態，有意識多咗，問佢嘢唔算好清晰，比往日進步冇咁大，需要時間啦，醫生都話要至少一星期先可以離開ICU（深切治療部），佢同親戚朋友傾偈都有反應。」

吳母見愛女盡量畀反應

問到是否鬆一口氣？Jinny表示：「因為始終都喺危險期入面，醫生話影響因素太多，未安全晒，大家都樂觀，相信媽咪好快好番。」問有為媽媽祈禱？她又指媽咪信奉基督教，自己則未有宗教信仰。提到剛剛探病與媽媽的對話內容是甚麼？Jinny聞言微笑稱：「我媽咪鍾意同我啲朋友相處，相對其他親戚，每次我朋友嚟到佢都反應好大，佢手腳會郁得好大。我啱啱同我好朋友KJ一人一句傾偈，窒吓佢！我問『你係咪唔想見到我呀？』，因為佢今日比尋日冇咁擘大隻眼，過一陣佢就擘大眼，眨兩吓又瞓番。好嘅，至少佢會做啲嘢大家都開心。」

男友人扮「呷醋」

Jinny又忍淚表示，每次見到媽咪插喉都非常心痛：「我同佢講有啲嘢好快就過，相信佢聽到我依番說話，好快會好番。」提到剛有人在病房外播放她的金曲《越難越愛》，她聞言笑說多謝。問到近日可會因擔心母親病情而消瘦？她稱未有刻意量度體重，但身旁的KJ稱有逼Jinny吃東西。她又指母親的男友向她「呷醋」：「佢（男友人）話『你媽咪淨係理你，你講嘢先擘大眼』，我知道佢好錫我媽咪嘅，都有問候吓佢。」