野生捕獲停不了　周潤發舊廣告翻hit

即將「登六」（快將60歲）的影帝周潤發，一向都深得網友歡心，而早前發哥又掀起「野生捕獲發哥熱潮」，人人有機會喺街上同發哥近距離接觸，而每次發哥都會來者不拒，仲會親手同市民玩自拍。

網民為咗可以更加了解發哥，喺網上不斷搵番發哥嘅舊片翻loop，其中一條二十年前發哥賣溫馨嘅片成為近嚟熱話，1996年發哥同夏文汐拍廣告，喺廣告入面發哥原來就扮演過政府高官，仲要經常飛嚟飛去開會，因為條片係1996年，同香港回歸嘅時間都係相隔一年，而發哥又係片中成日飛去內地講晒普通話，似乎為回歸做好準備。不過發哥就因為太忙，無時間陪伴太太夏文汐，要經常靠電話聯繫兩人感情，不過最終發哥都醒覺，放下工作，即刻陪返夏文汐同囡囡，認真好男人！唔少網友睇完都話，喺廣告入面發哥扮高官扮得好似，開會嗰陣個樣仲特別CHOK爆同留心，有潛力去從政咁話！

另外，有眼利網友發現係廣告入面做發哥囡囡嘅童星，就係有「翻版高海寧」之稱嘅向殷，讚佢細細個就已經眼大大好可愛，細細個就注定食呢行飯！

網友有話兒：

JXXie LXm： 發哥好型啊！

X泰： 真懷念那時代，做什麼都會成功的時代，只要你肯做一定有機會出頭天的時代。

nytXXX： 周潤發 + 夏文汐... 無懈可撃！

XXyou：發哥不如諗下從政啦！