網民熱話:陳凱彤係G.E.M.同衞蘭混合體?

20150403
東網電視
更多新聞短片
英皇力捧新人陳凱彤(左)係G.E.M.(右下)同衞蘭(右上)混合體?皆因佢都好唱得!

新一代嘅樂壇女歌手之中,數到公認唱功出色嘅,鄧紫琪(G.E.M.)同衞蘭(Janice)一定走唔甩。由香港出道,喺大陸爆紅,繼而唱到上太空嘅「宇宙巨G.E.M.」,人氣高之餘是非亦不斷,近日更被飛出《我是歌手》巔峰會!而衞蘭(Janice)雖係公認有實力,不過一度被指身形臃腫,連黎明都話佢「肥過部電單車」!唔同黎明續約嘅Janice,據知依家物色緊新公司,仲未有定案。

而喺呢個時候,竟然殺出一位G.E.M.同Janice嘅混合體?呢位英皇力捧新人陳凱彤(Lilian),據講係《英皇新秀歌唱大賽2013》冠軍,訓練咗年幾先出道!有網友搞笑地話一聽Lilian,以為係時裝設計師簡幗儀(Lilian)。不過有眼利網友就認得,呢位Lilian原來曾經參加過2010年嘅無綫《超級巨聲2》!雖然Lilian喺《巨聲2》落敗,不過目標明確嘅佢,前年再接再厲,參加《英皇新秀》成功奪冠,仲入埋英皇備受力捧,可以話有志者事竟成!

第一首派台歌《第一眼》一出,Lilian即獲網友關注!話佢把聲有Janice嘅影子,鼻音又似G.E.M.,可以話係前途無可限量呀!仲有網友話佢體形豐滿,不過即有人力撐話咁樣唱歌先夠氣呀!雖然MV仲未出,但佢嘅Instagram就有好多靚相睇喇!唱功了得嘅Lilian樣子甜美,不時會出吓騷,仲有粉絲整燈牌畀佢o添!

網民有話兒:

X仔:巨聲2果(嗰)陣我都好鐘意佢架(o架)!
戀XX比:肥妹唱歌先至夠氣
陳XX公:以為lillian kan,跟住醒起佢姓簡
Ruxx Xxng:D(啲)鼻音其實有D(啲)似G.E.M.
justxxxxx xxang:聽到0:25覺得佢把聲有janice(衞蘭)影子