鍾意刺激！馬楚嵐最怕被騙財騙色

有「嫩口周海媚」之稱的模特兒馬楚嵐（Nina）自認典型水瓶女，愛幻想及喜怒無常！外型嬌滴滴的她自爆最享受欣賞恐怖片時的刺激感，但擇偶則非常審慎，全因身邊女性友人曾遭騙財騙色，令她不敢貿貿然開始戀情。

年輕活潑的o靚模Nina甜笑時有對腰果眼及兔仔牙，貌似女星周海媚，身材亦跟正版一樣有睇頭。熱愛看書及睇電影的她自認愛幻想，屬典型水瓶座性格：「我性格幾矛盾，時嘈時靜，好似精神分裂咁。大家都覺得我脾氣好，但又忽冷忽熱，唔出聲時令人誤會好寸。」

最愛大隻男

問到最愛看哪類電影？外型斯文嬌滴滴的Nina的答案竟然是血腥恐怖片，認真嚇你一跳！她說：「我品味幾奇怪，唔多睇愛情片，鍾意睇懸疑片，甚至血腥暴力、喪屍！鍾意刺激嘅！啲男仔成日同我睇鬼片，我目不轉睛完全唔驚，佢哋都好驚訝，試過同男仔睇，我安慰番佢轉頭添！」

雖然興趣大膽，但Nina現實中是一名小女人，需要男友保護，最愛陽光大隻男，更視韓國組合Big Bang的太陽為男神：「之前睇佢表演，我感動到不停尖叫。欣賞佢唱歌跳舞，感覺又健康。」但她表示有女性友人曾被騙財騙色，令她也對感情卻步，不敢貿貿然開始戀情：「就算一見鍾情，都要慢慢了解吓。我亦唔會主動追人，所以好難有機會拍拖。」

想有超能力

Nina兒時最愛看童話故事，更會天馬行空，幻想自己是故事人物去冒險：「最記得係《愛麗斯夢遊仙境》，我想離開呢個世界見唔同嘅人同事，我仲想自己有超能力，最想穿越時空，返去以前改變好多嘢。（想改變啲乜？）最後悔係當年讀書唔夠努力，所以呢年會增值進修。覺得做model除咗樣都要有知識，以前讀過設計，之後想學多一樣外語，希望第時有機會做作家。」

Profile：

馬楚嵐（Nina）

年齡：21歲

身高：1米65

三圍：32C、24、33

興趣：閱讀、看電影、美術