傻傻分不清！佢哋有咩親戚關係？
20150410
東網電視
更多新聞短片
佢哋嘅親戚關係真係唔講唔知，有啲知道咗真係大嚇一跳！
娛樂圈男女關係複雜係人都知，但係親戚關係你又知幾多呢？有啲唔係佢哋自己講出嚟真係冇咩人估到，因為冇樣睇㗎嘛！但係有啲就似樣到你以為佢哋有關係，點知原來冇嘅！今次就同大家講吓邊幾個真係有親戚關係啦！
馬德鐘、朱咪咪
男神馬德鐘，早前喺朱咪咪嘅演唱會中做嘉賓，一上台就嗌咪咪姐做阿嫂，原來咪咪姐老公係馬神嘅堂阿哥，呢個隱世20幾年嘅秘密，咁多年都冇咩人知，直到當時喺台上先由佢哋自爆堂兄嫂關係，真係嚇死現場觀眾！不過，原來咁多年佢哋都只係合作過一部劇，仲要係無對手戲，所以都令到唔少網友同觀眾都大感驚訝！
張智霖、曹查理
張智霖（Chilam）有個圈中表姐就好多人都知，就係上山詩鈉啦！皆因上山詩鈉成日都同佢、蔡一智仲有伍詠薇等人一齊玩，雖然上山詩鈉已經退出幕前，但曝光率仍然高企，而佢個囡囡Hilary仲被網友封佢做女神添！但係原來Chilam仲有個明星舅父！佢就係曹查理啦！佢30幾年前憑一個酒嘅品牌廣告而入行，仲拍過電影《警察故事》同《最佳損友》添！唔通明星相真係有樣睇？
倫永亮、張敬軒、張繼聰
張繼聰同張敬軒同姓三分親，但真係有親喎！張繼聰係張敬軒嘅表舅父嚟嘅！但係張敬軒仲有個長輩級親戚喎！倫永亮原來係張敬軒嘅表舅公、係張繼聰表舅父嚟！真係夾都冇咁啱，三個人都係歌手出身，音樂細胞隔咁遠都遺傳到？
林海峰、林曉峰、林珊珊、狄龍
林氏一家親嘅林海峰、林曉峰同林珊珊，三個都喺娛圈生活，但係三個條路都唔同。林海峰除咗係電台DJ，唱歌搞演唱會仲開埋棟篤笑添！而幕前嘅工作就交咗畀細佬林海峰，佢唔止做過電台DJ，唱歌同埋「古惑仔」一齊開Show，仲拍埋電視劇添！而佢家姐林珊珊依家就係經理人啦！不過，原來佢哋有個巨星級舅父㗎！佢就係武打演員狄龍，而佢呀仔譚俊彥就係佢哋三個嘅表弟啦！
以上嘅親戚關係珍珠都冇咁真，而假嘅都有唔少人信以為真㗎！去年張家輝就講到話張學友係佢親兄弟，有網民即刻查族譜求證，原來係家輝同大家講笑啫，如果係都咪話唔驚！有一對「父子」都畀人當真，王祖藍同黃光亮似樣到難以置信！王祖藍都要喺劇集《老表！你好嘢》邀請黃光亮，喺劇入面做父子，滿足晒定大家嘅需要啦！
網友有話兒：
goxxxxxxu：有啲似樣
玫XX丹：最估唔到朱咪咪是馬德鐘的阿嫂
洪XX火：有d（啲）聽過佐（咗）
Nxxxy：仲有好多添..例如上山安娜係張智霖既表姐，而曹查理又係張智霖既舅父，秦沛，姜大衛（偉），爾東（冬）昇（陞）係三兄弟