亞視不獲續牌：蔡國威否認搵萬綺雯搭路跳槽

亞視助理副總裁冼偉智、藝人蔡國威、秦啟維及梁安琪到火炭，為節目《搖擺天使》進行最後錄影。冼偉智說：「我一年前同梁安琪合作搞《Loving Hearts Loving Bands 勵志歌曲創作大賽》，好好反應，起初公司都質疑Indie Bands（獨立樂隊）冇乜人識，後來證實好多出面機構都跟住做好多Indie projects，今日我嚟撐番Angel（梁安琪）節目《搖擺天使》。（搞第2屆勵志歌曲創作大賽？）要睇吓有冇贊助，如果搞應該係8、9月。」

冼偉智未搵後路

提到亞視被法官指如明知營運困難，不如早點結束，他說：「政府都叫亞視做到明年，可能法官咁講係基於要保障各界，亞視同事一直好努力、齊心，唔會因為咁而影響到工作情緒。（胡景邵入亞視傾投資？）佢入亞視接受訪問。（你搵工未？）我未諗住，唔好畀壓力任何人，留守到呢一刻嘅員工，老闆好應該珍惜，我作為管理層，如果員工有任何新發展，我都留唔到。」

蔡國威好想快啲知亞視決定

蔡國威被問與萬綺雯飯聚，是否搭路跳槽？他說：「見吓面傾偈啫，冇叫我過檔，實在我到呢一刻都冇收到任何一個電視台搵我，我又唔知應該搵邊個，所以冇自薦，不過我好歡迎大家搵我。（點睇法官叫亞視早點結束？）員工都好想快啲知個答案，公司究竟有乜決定？繼續做落去定點？我都想知呀！唔好再咁多方案喇，應該一就一，二就二！」