蔣怡預告廚藝畢業孖老公歐遊造人

名模蔣怡去年獲珠寶設計師老公翁狄森支持，達成學廚夢，到倫敦攻讀「巴黎藍帶廚藝學院倫敦分校」課程，轉眼間，課程已完成大半，如無意外，今年六月便告畢業，為了答謝老公，她決定再做媽咪，六月的畢業旅行，變相成為造人之旅。

恨生囝囝

蔣怡與翁狄森拍拖13年，兩年前在南非結婚，結束愛情長跑，兩人現育有一女翁容，快將兩歲，蔣怡因為理想要與女兒分離，若不是翁狄森的鼓勵和支持，她未必能夠作出抉擇，故她決定畢業後，將偕夫婿到歐洲旅行，順道造人，給對方作補償之餘，亦為女兒添個伴，她說：「畢業後會同翁生去歐洲旅行，淨係我兩個，準備去造人。（想追仔？）想畀個女多個伴，多啲人鍚佢，有個女自然想有個仔，咁樣完美啲，如果又係生女，包括埋我在內，屋企有三個女人，我諗翁生會頂唔順，哈哈。」

學廚忍唔住食清光

蔣怡當年陀着翁容時，曾驗出患有妊娠糖尿，故今趟造人隨時搵命博，而性格樂天的她表示不擔心，還笑言學廚時，經常忍不住口，將自己的製成品吃清光，說：「呢排學廚整好多甜品，整完唔止試食，係忍唔住全部食晒，因太鍾意食甜品，都無再特別去驗血糖，應該無事卦。」