網民熱話：8年前江欣燕　今日翻Hit做女神

唔少人定義「女神」都係「有身材加靚樣」，長腿一定走唔甩！但其實有好多人都覺得呢啲一律唔重要，反而更鍾意「叻」嘅女人。就好似近日無綫重播2007年處景劇《同事三分親》咁，即刻吸引網民重新注意飾演「戴安娜」嘅江欣燕（欣欣），有網民喺討論區以「同事三分親江欣燕真係好正」為題開Post，即吸引大量網民留言表示有同感。仲話戴安娜係時代女性嘅典範，又叻又靚之餘，又不失女性柔弱，別具「熟女」魅力咁話喎！

完美演繹年輕角色

有心水清嘅網民就指出，江欣燕雖然飾演戴安娜嘅時候已經成40歲，但佢飾演起30零歲嘅女強人戴安娜依然無難度，更加演繹出獨特嘅氣質，令到網民心悅神服！

OL造型夠晒有Taste

喺劇入面，江欣燕以長曲髮「OL Look」示人，有網民就話佢呢個造型Charm爆，仲話要日日追爆套劇！除咗男仔鍾意睇，原來仲有唔少女粉絲，佢哋個個視戴安娜為偶像，皆因覺得佢衣着有品味之餘，仲好有能力，內外美兼備！

剛中帶柔散發女人味

就連戴安娜嘅性格，都備受網民熱捧。網民力讚編劇將戴安娜一角塑造得相當立體，奸又唔奸得晒，仲要剛中帶柔，令網民覺得佢好真實。

而最終嘅結論係，大家都覺得「戴安娜」係為江欣燕呢個「老戲骨」而設，仲話只有佢先能夠演繹出戴安娜嘅精髓，真係誇張到哩。雖然套劇都已經成8年前，但係欣欣都冇咩點變，仲係當年嘅「女魔頭」，難怪網民都話要封佢做女神呀！