網民熱話：鵬哥阿Bob穿越時空Crossover

潮流興復古，唔止衣着打扮，天后容祖兒新碟封面造型都復刻成80年代的日本女星。呢股潮流終於蔓延到電視劇，無綫宣布喺下星期重播1992年嘅經典神劇《大時代》時，即刻引起哄動，可見大家都非常懷念以前嘅劇集同節目。網民們都心郁郁翻睇往時嘅經典片段。當中大批網友就極力推薦2010年盧海鵬（鵬哥）喺第22集嘅《超級遊戲獎門人》中玩「搭錯線」嘅片段，當時嘅鵬哥比起依家一眾出色嘅搞笑能手好似林盛斌（Bob）、王祖藍、阮兆祥同金剛等等，真係前輩中嘅前輩！

鵬哥交足晒戲

玩「搭錯線」嘅方法就係兩個人分別戴上播住音樂嘅耳機嚟隔音，輪流喺問題板同答案板以答問模式隨心抽選一句句子讀出嚟，如果兩個人所揀嘅問題同答案互相符合，就可以得分。呢段片段好笑絕對係因為鵬哥喺遊戲中交足晒戲，冇Hea答，佢嘅聲音、表情同情緒配合一齊，真係一流！就好似當時鵬哥喺呢個遊戲嘅拍檔係李麗蕊，當李麗蕊問「情侶鬧交最後會講咩？」，正確答案係「我哋分手啦！」，但鵬哥就答咗「我冇飲醉！」，仲配合埋表情，令到在場人士好似主持人曾志偉等等，笑到前仰後翻！

鵬哥阿Bob穿越時空一問一答

有網友仲將呢排好紅嘅阿Bob同鵬哥嚟個穿越時空Crossover，用最近阿Bob喺《至尊街頭魔法王》嘅對白，配上鵬哥玩「搭錯線」時嘅答案，效果同樣令人笑到喊！就好似阿Bob喺節目中問餐廳客人：「杯水借用一下好嘛？」，後期製作技術高超嘅網友就配上鵬哥神情勞氣所講口嘅「你走咗就唔好返嚟！」，真係笑到有腹肌！

盧海鵬試咪

其實鵬哥早年已經喺《歡樂今宵》做台柱，最令人難以忘記就要數佢喺《蝦仔爹哋》入面經常爆肚講押韻對白，就好似好多人聽到「盧海鵬」就會自然諗起「盧海鵬試咪」，當時鵬哥試咪時唔講testing，而講咗「盧海鵬試咪，X你XXX」，咁就喺80年代留傳至今啦！佢爐火純青嘅搞笑功力，日日翻睇都仲得，大家又點會忘記呢？香港嘅回憶係屬於香港人！