巨聲幫王嘉儀一畢業即出碟

20150418
東網電視
更多新聞短片
王嘉儀話畢咗業就會活躍番。

曾參加《超級巨聲》的歌手王嘉儀出席慈善音樂會開幕禮,首次參與慈善活動的她表示很開心:「好耐冇出席公開活動,今年中大畢業後就會活躍番,今日呢個活動就可以令自己嘅天賦得到發揮。(畢業後就會進軍樂壇?)哈哈,唔知係咪進軍,係同大家分享我嘅音樂。(今年會唔會出碟?)自己一直都寫咗三、四首歌,唔知會唔會出碟,但起碼會出EP或者single,出四首歌咁,希望今年出到。」問到她有機會會否想好似其他巨聲幫般加入星夢等大家庭?她就笑言:「之前都有啲朋友加盟咗,我哋巨聲全部都好熟,但唔知呢,未有人搵我。」

嘉儀透露現時有跟趙增熹學製作音樂,問到出名要求高的阿熹可有很惡?她就笑言:「唔係呀,好多人以為佢好惡,但佢係超級輕鬆,我成日講爛gag逼佢笑,佢都有和應我,我將佢潛在嘅幽默感散發出嚟,不過studio製作嗰陣就好認真嘅。」她亦透露七月會參與音樂劇。

另外,談到之前曾參與《超級巨聲》的李寶龍昨晚奪得《中國好聲音》第四季香港招募站的冠軍,嘉儀驚喜表示:「佢冇同我講嘅?恭喜佢!好開心佢不嬲都做得好好,佢參加八強前一晚我哋有一齊飲嘢,佢好乖,話好多嘢都唔食得或飲得,因為要預備比賽,所以佢畀咗好多心機,希望佢之後繼續努力。(會唔會想好似佢咗參加呢啲節目?)隨緣啦,機會嚟到唔會拒絕,但依家未到時候所以繼續努力。」