鄧紫棋唱歌畀人叫「滾」？馮允謙感傷心可惜

歌手馮允謙（Jay）出席電台訪問，正籌備新碟的他早前推出了新歌《Let's keep this tonight》，他謂這次是特意推出重節奏的快歌：「因為重beat啲就開心啲，做騷個效果都好啲！首歌講拍拖散咗之後再重遇番，想帶出second chance呢樣嘢！」雖然新歌MV仍未拍攝，但Jay表示希望MV中能有女主角：「一定要有女主角，同埋希望有故事性，我picture到個背景會喺Club入面嘅。」

唔多夜蒲

問到是否經常落酒吧飲酒？他說：「我唔多，幾乎冇咁滯，因為我跳舞又唔好睇，又唔係想去識女仔，有時會同啲Friend去social吓，但唔會晚晚去劈酒，同埋我發覺一飲酒唱歌就會封喉，所以都少飲！」

同鄧紫棋少聯絡

提到緋聞女友鄧紫棋（G.E.M.）在湖南出席商演時有人高舉「鄧紫棋滾出娛樂圈」的牌，Jay說：「我冇聽過，但會覺得好sad同好可惜，佢唱歌好好聽，好努力去做音樂！我發現好多人都比較想睇娛樂新聞，但希望多啲人會pay多啲attention落音樂！」他又謂與對方最近少聯絡，因為大家都忙於工作。

想作出新嘗試

而昨日的金像獎頒獎禮中，Jay的好友林奕匡有份擔任表演嘉賓，Jay表示為對方感到高興：「佢有同我講話好緊張，我尋日睇覺得佢做得好好，有機會我都想去！（想唔想試演戲？）我咩都想試，之前都有同公司傾過想試吓！同埋之前我幫新歌拍咗個微電影，個setting係喺我爹哋媽咪結婚三十周年度，我喺嗰度遇番舊情人，會show吓我同個女仔以前嘅嘢，都幾sweet，相信啲粉絲都會鍾意！」

想加拿大置業

提到「丁蟹效應」，Jay坦言未聽過，而自己亦沒有買股票，現階段要先儲錢。問到儲夠錢後第一項是否投資？他說：「買樓，好似會穩陣啲，不過未必喺香港買，可能喺加拿大買。香港啲樓太貴，一層要幾百萬，喺加拿大都可以買到幾間。」