王浩信晒Big鵰　朱千雪：三點式多布過佢

好耐之前已經秘密練「肌」嘅王浩信，呢日為咗新劇《EU超時任務》剝剩底褲通街跑，展示其驚人「Big鵰」。唔知係細路女未見慣世面，定還是王浩信真係太「強」，同劇嘅朱千雪拍攝期間不時偷望「BIG鵰」，仲一度忍笑伸脷，令原本已經好搞笑嘅場面更加funny。

王浩信昨日為新劇《EU》犧牲色相，在旺角與前港姐朱千雪及資深演員雪妮拍外景，劇情講述王浩信除剩底褲，勇救「媽咪」雪妮，不但要拖着雪妮在橫街窄巷內穿插，更要孭起雪妮，感覺比拍武打片更消耗體力。由於動作場面吸引，加上王浩信渾身是肌，現場吸引不少少女及太太圍觀，齊齊舉機爭影閃卡！

谷肥拍劇冇打底

而全情投入的王浩信，則未有受圍觀人士影響，在酷熱天氣下，孭住雪妮跑來跑去，雖然雪妮能夠一親王浩信「肌」味，但她似乎並不享受，更一度乸口乸面，一落地更即用濕紙巾抹手，令在旁的朱千雪睇到眼凸凸！

狂食腩肉白飯增肥

王浩信事後表示赤裸上身是為配合「土豪村長」角色，又直言冇為「小浩信」打底：「唔知着底褲仲可以點打底！依家肥咗十磅，其實之前拍《東坡家事》都除過褲啦！今次監製都叫我盡食，叫我老婆乜都整啲，食腩肉呀、食多兩碗白飯呀，仲食埋消夜，但我一路食就一路內疚，仲要得一個月時間增肥，我都盡食o架啦！」

自認賤男

至於朱千雪，則自嘲拍埋王浩信身邊要投降認輸：「今次我輸晒啦！就算着三點式都多布過佢！（再少布啲？）電視尺度應該唔得！」她又自爆之前不覺意摑了王浩信一巴：「我哋排緊戲嗰時，唔覺意真係打咗佢一巴，太投入喇！」王浩信即自嘲是賤男打圓場：「我個角色係一個賤男，成日都畀佢打，畀人打到最甘都係呢套劇！（畀人打咗幾多次？）真實就一次，其他就唔好提喇！」

陳自瑤唔怕老公被睇蝕

呢邊廂王浩信拍得勁投入，那邊廂老婆仔陳自瑤（YoYo）亦唔怕老公被睇蝕：「平時去沙灘游水着泳褲都一樣！只係依家搬咗出市區啫！（覺得老公身形點？）Ok啦！睇佢自己滿唔滿意，我就唔太高要求！」問到夫妻檔性感演出會否更駕輕就熟，YoYo未有表現抗拒，並說：「睇劇情有咩需要，作為一個演員，唔理係咪老公，工作上都係對手！我哋好專業！」