胡慧中新書紀錄愛：邊做訪問邊喊

息影女星胡慧中舉行新書分享會，她表示新書紀錄了12位愛心人士的動人故事，由籌備、採訪及撰寫，足足準備了六至七個月，續說：「由睇每個背景資料、訪問採訪着手，再同每一個咁傾，我開頭睇資料嗰陣就諗點解冇人將啲資料集成一本書，不過呢個可能同我讀歷史有關，鍾意整合資料。」她又稱每個人的故事均十分感動：「每個人故事都唔同。（採訪有冇喊？）一邊訪問一邊喊，係度諗點解啲人咁偉大，唔明點解啲人自己受咁多苦難都仲可以去幫助人哋，所以話唔係要有錢先可以做善事，有心就得。」

問到近來有何新工作，她說：「都係做宣傳新書嘅訪問，同埋私人屋企嘢。（唔想再表演？）同我個女表演，同佢跳舞唱歌。（囡囡幾大？）佢依家讀中二，（開始反叛？）有時反叛，每日要花好多時同佢傾偈，但佢覺得我煩，世界上最難做嘅就係做父母。」另外甄珍和鍾慧冰亦有現身捧場，二人還在台上大讚胡慧中性格爽朗、率直和善良，甄珍更希望她的愛心可散布世界每個角落。