做完矯視手術！貪靚雷禮權眼仔睩睩

「九巴後人」雷禮權（William）出席慈善晚宴，表示最近在英國進行了新進的矯視手術，指香港暫時仍未有此先進的技術，故特意飛往當地近六個星期：「個手術好勁，醫好咗我嘅老花，仲有近視同遠視都冇埋，個手術曾經喺05年獲諾貝爾獎，主要都係飛機師同醫生做多，因為佢哋工作要望遠啲。（同普通矯視手術有咩分別？）做完好完美，好後悔之前做普通矯視手術，都做咗有十五年，唔做仲好，因為到五十幾歲就冇用。

問到手術有冇風險？他表示：「咩嘢都有風險，最緊要搵到好醫生。（咁手術要幾錢？）近二十萬，如果唔計食宿等等，但我英國有屋企，而且香港都冇呢個手術，我戴咗保護眼鏡都有成六個星期。（有冇介紹畀身邊朋友？）我成日最早做先，佢哋之前個個都唔敢，但依家個個都飛去做。（所以今日雙眼特別精靈？）因為今日貪靚戴咗大眼仔啫。」他又指太太利蘊珍非常幸運，因視力一直也非常正常。

另外，貪靚的William亦透露即將到德國進行關於牙齒矯整手術：「之前箍牙將四隻虎牙同大牙磨平咗，會影響口腔郁動，口腔唔健康會影響有心臟病。（咁要點整法？）都要幾個月時間，但要檢查咗先知點整，本身話將全排牙整晒金色，但我要唱歌所以唔想咁核突。」