日前「宇宙巨G.E.M.」（鄧紫棋）被英國媒體《每日郵報》封為「China's Taylor Swift」，指兩人同樣年輕成名，又擅長玩樂器。報導一出即惹起網民注意，而G.E.M近年紅遍大陸，報導亦因此而掀動大陸粉絲討論熱潮。不論係中港兩地嘅網民，都紛紛喺各大討論區轉載報導，將兩位「巨星」進行大比較！

G.E.M.對於被形容為中國Taylor Swift，佢直言覺得榮幸，仲話自己係受到對方啟發。但對於網民而言，就認為兩人喺當紅程度同實力上，都好難相提並論。畢竟Taylor Swift紅遍英美等地，而喺其他地方亦為人所熟，至於G.E.M則只有攻陷華語市場。加上兩人曲風唔同，前者主要唱美國鄉謠為主，以獨特抒情風格走紅；而後者則憑着「巨肺」上位，嘶聲力竭唱出心中情。

雖然講到國際地位G.E.M.未必及Taylor Swift，不過網民都一致認為，兩人有一個共通點，就係「人紅是非多」！人稱「樂壇小天后」嘅G.E.M多次被指耍大牌，而引發起連串風波。早前就傳出因激怒大陸節目《我是歌手3》總導演洪濤，而要被換走於《我是歌手2015巔峰會》嘅舞台上。另外，G.E.M又喺上年年尾嘅頒獎典禮慶功宴上遲大到，令一班歌手同記者等到黑面！至於「美國鄉謠小天后」Taylor Swift喺是非上，都唔輸G.E.M。外界一直傳出Taylor Swift到處樹敵，繼與美國歌手Katy Perry交惡後，又被指與Justin Bieber前女友Selena Gomez結怨。

有見及此，《東網》為兩人列出一個Profile，讓讀者自行再作比較：

G.E.M.

出生日期：1991年8月16日（23歲）

稱號：樂壇小巨肺、宇宙天后、金魚G.E.M.

入行經過：16歲以「Where did you go」、「睡公主」幾首代表作成名，於去年參與《我是歌手2》而深得大陸歌迷關注，打入國語市場

威水史：獲選首位《全球華人形象大使》，任命於今年坐飛船上太空

Taylor Swift

出生日期：1989年12月13日（25歲）

稱號：美國鄉謠小天后、歐美天后

入行經過：19歲憑《Love Story》一曲一舉成名，MV中清純公主造型深入民心

威水史：獲美國《財富》雜誌選為「全球50偉大領袖」第6位、入選美國《時代》周刊百大最具影響力人物

網民有話兒：

馬xxx核：taylor swift仲要聽一首歌同聽成隻碟都冇咩分別

熱xxx：不能比的好吧！風格不一樣，而且Taylor出道比GEM早多了！

xxx茶：鄧紫棋頂多在中國比較有名，和Taylor沒可比性

Maxxxn Lee：高度差很遠，不過兩個也很有才華

Dennis xxx：Taylor唔洗（使）嘶聲力竭唱歌