網民熱話：忘不了的郭藹明

近日《大時代》喺深夜重播，大家都好捨得捱眼瞓追睇，就係為咗睇番咁多位嘅神級演技！鄭少秋飾演嘅丁蟹多人講不在話，就連只係短短出現一星期左右嘅方進新（劉松仁飾）亦令人懷念，更令大家流下唔少眼淚。雖然方進新就咁畀丁蟹打死咗，但萬眾期待嘅郭藹明終於出場啦！郭藹明個種「Chur到你死」嘅態度真係令人睇到拍晒手掌，不禁要講聲佩服佩服！「龍紀文」郭藹明同「方展博」劉青雲有唔少對手戲，兩人鬧交時，方展博就靠嚇，叫龍紀文跟佢返屋企。雖然最後佢哋劇入面無一齊到，不過現實中郭藹明就真係跟咗劉青雲返屋企喇！佢哋結咗婚之後，郭藹明就做咗成功男士背後的女人，幕前嘅演出就變得相當珍貴。

被網友封為「神級港姐」嘅郭藹明，唔止有樣有學歷，演技仲一流，就連劇中嘅「陳滔滔」林保怡都忍唔住喺早前嘅專訪中大讚佢係「純用直覺去演戲嘅天才型演員」，仲話如果唔係咁早嫁畀青雲，可能已經攞影后。雖然係咁，但做影帝嘅女人都唔易㗎！有唔少網友都不其然回憶郭藹明之前嘅作品，話佢喺2004年幫無綫拍嘅最後一套劇《足秤老婆八両夫》入面，雖然造型麻麻，不過大讚佢做得好，仲希望無綫可以重播等大家回味吓！

仲唔止呀，唔少網友都話佢喺劇集1995年《刑事偵緝檔案II》同1999年《狀王宋世傑》入面都好好戲，仲好希望佢可以快啲復出拍劇，等大家可以再睇到佢演技，不過亦有網友就話依家郭藹明做劉太做得咁幸福，唔想佢拍劇捱通宵咁辛苦喇！

網友有話兒：

白X娘：我到而（依）家都接受唔到依個髮型

X簡XX犯：斗倌！

食麵XXX :依家睇返（番），好女朋友feel。

田XX：好好睇喎呢套野（嘢）快d（啲）重播

西裝友XX：秀外慧中邊度搵？