成日被催婚　容祖兒：結婚係為咗生BB

容祖兒（Joey）亮相無綫娛樂新聞台節目《StarTalk》，接受主播許文軒（Edmond）訪問，大談新碟製作趣事及愛情觀。Joey與劉浩龍拍拖多時，被Edmond問到何時出嫁？她說：「未諗，不過每個人都有呢一日，自己嘅計劃未去到呢日。（有冇人催婚？）得歌迷同傳媒催，對我嚟講，結婚係為咗生BB，如果唔係生BB，咁可以一直拍落去。我都鍾意小朋友。（幾時生？）遲啲先算！」

Joey透露若然結婚，喜歡一切從簡，她說：「我寧願旅行結婚都唔擺酒，因為好煩，好似做騷咁，要同唔同部門溝通，所以想簡單啲，或者我會結咗婚先公布畀大家知。」被問有否擔心自己的天后地位，會給另一半造成壓力，她說：「兩個人相處唔會畀呢樣嘢束縛住，只係外界太多標籤。（佢有冇Hard Feeling？）我諗冇，其實我都唔係好王者啫！我鏡頭後都好小女人。」

親邀馮寶寶張學友拍MV

Joey又指為了新唱片，做了很多聯絡工作，包括親自邀請馮寶寶及張學友拍攝MV，又邀請日本女歌手五輪真弓作曲，五輪真弓更因為聽過Joey的《心淡》，才答應為她寫歌。提到跟學友拍MV，她更形容自己緊張到「反櫈」。Joey透露有趁與學友合作期間，把握時間與偶像傾偈，她說：「我問佢同囡囡嘅嘢，我自小缺乏父愛，佢係好爸爸，所以想感受吓父愛，佢仲叫我唔好再參加以後嘅頒獎禮，學友講嘢好有說服力，佢話依家頒獎禮唔似以前，比較有娛樂性，當時真係搞到我想唔再參加。（依家決定唔參加？）太多顧慮，好多人要交代，所以未決定，五月時間尚早啦！」

身體出毛病學會珍惜

Joey又指去年媽咪及自己的身體均出現毛病，令她更學會珍惜，她說：「對我嚟講工作永遠第一，但生活都要顧及下，愛多啲身邊人，以前真係好難抽時間陪家人，依家每日都會同媽咪有好多聯絡同通訊。」