否認不和　李麗蕊爆當年幫思浩整登台衫

藝人李麗蕊以司儀及嘉賓身份出席卡啦ok大賽，自爆當年曾為好友梁思浩親手縫製登台珠片衫：「因為當年冇錢，又要返大陸登台，我哋住樓上樓下，成日見佢好忙，又要返電台，又要登台，所以我就自己買釘珠、閃珠片DIY幫佢整珠片衫，我仲記得整嗰件係牛仔褸，坐喺屋企用咗四、五個鐘幫佢整，佢一返嚟就即刻攞件衫出去搭火車去大陸登台，所以呢件係我哋友誼嘅見證，佢都好長情，仲keep住件衫。（思浩有冇幫你整番？）梗係冇啦！不過女仔珠片衫易啲搵嘅，所以我可以自己搞掂，佢就需要人幫手，我哋親密程度已經係去到我好似家姐咁照顧佢。」

談到早前有傳兩人不和，她則否認反面：「件事好得人驚，因我哋兩個完全冇講過裏面嘅嘢，同埋唔會去到咁嘅情況，我哋係好朋友，有乜都會講，唔會中間有誤會，成件事係假嘅，係中間有啲人講呢啲是非，自己亦心裏有數邊個講。」她亦謂此事當然沒有影響兩人感情，而且有次兩人在電視節目內講到此事，其中思浩講了一句令她很窩心：「佢話『以後我哋大家就係一世嘅好朋友，總之一日有我就有你。』，我自己後尾諗番都感動到喊，尤其是喺娛樂圈好難有朋友一生一世，同埋佢係喺電視咁樣講，所以大家感情心照。」