【即係點？】陳凱琳認完拍拖又轉口風！

前港姐冠軍陳凱琳（Grace）出席慧妍雅集慈善晚宴，問到與緋聞男友鄭嘉穎是否已開始拍拖，Grace最初先表示：「係呀！依家開始，認識當中，喺荷蘭拍完劇之後更加了解佢為人，佢對身邊人都好，例如羅蘭姐班前輩。（對你呢？）好肯教我哋呢班新人，例如陸永同 Anjaylia（陳嘉寶）。」而當記者恭喜她時，Grace即轉口風指：「依家開始，意思係指開始做訪問。（咁同鄭嘉穎依家究竟係咩關係？）好朋友，唔係拍拖，佢人好好，喺佢身上學到多嘢。（呢杯茶嗒得過？）唔識答。」

有時間會赴嘉穎約

而對於鄭嘉穎表示兩人如出外行街及看電影，希望外界不要過於驚訝，而Grace也表示認同：「係咯！大家唔好驚訝。（如果佢約你單獨去街？你會唔會去？）拍劇都好忙，遲啲又要返加拿大，加上啱啱喺荷蘭返嚟，睇吓有冇時間約出嚟見吓！」