娱乐专题：蔚雨芯无悔性感闯娱圈
20150511
东网电视
更多新闻短片
蔚雨芯强调不会为性感而性感，更坚拒裸露演出。
年仅21岁的“魔鬼胸”蔚雨芯（Rainky）于歌坛失意时，却凭性感形象为自己带来另一条出路，演艺之路不易行，幸得家人一路上的支持和鼓励，令她得以努力向前。最近演出古装剧《末代御医》的她，不想局限于做细路女角色，她表示愿向高难度挑战，就算要剃光头也在所不惜！
走捷径 无悔出写真
蔚雨芯（Rainky）三年前以歌手身份入行，年纪轻轻的她深明在歌坛立足甚艰难，入行初期亦有失意时：“依家乐坛愈嚟愈萎缩，净系单靠唱歌会好难行，以前好畀心机唱歌但冇人赏识，系有灰心过，嗰阵公司仲花咗好多钱帮我拍MV，又搵埋出名嘅排舞师同我排舞，但回报往往都少过付出，愈摆心机嘅就愈冇人留意。”
谁知一个旅游节目带来的不只“魔鬼胸”之名，更给了她另一条出路：“拍完个旅游节目后，队crew好欣赏我，仲帮我出写真，当时有挣扎过惊会有闲言闲语，但难得有人投资我，而且做新人要多元发展先有机会突围，可以畀大家睇到我嘅另一面，咁点解唔试吓？好幸运出完写真后多咗人识，仲有得拍广告同拍戏，所以我冇后悔出写真㗎！”
抗拒裸戏
性感形象为Rainky带来陆陆续续的演出机会，去年亦过得极为丰收，但她强调不会为性感而性感，更坚持向露点说不：“唔想畀大家净系记得我性感嘅一面，所以唔会谂裸露演出，就算有都要问准晒屋企人同公司，决定权喺佢哋手上，同埋我嘅底线已经喺写真集出咗，十年内都唔会再影写真，可能三十岁之后先再谂啦，就算我上年去南极拍节目着三点式影相，都唔系卖肉sell身材，而系难得可以去到咁远咁冻嘅地方，可能呢世只系会去一次，所以想挑战吓自己做啲平时做唔到嘅嘢。”
遇阻滞 家人撑到底
虽然Rainky在演艺路上渐有收成，但工作中难免会遇到不少压力，幸而她一路上有家人无限的鼓励，亦不介意她走性感路线：“屋企人对我行性感冇负面睇法，佢哋咩都肯畀我去试，况且我又唔系做啲咩衰嘢，我自己嘅思想亦够成熟，唔会刻意sell性感。”
一向重情重义的她与家人关系密切，去年在《美人鱼》海选时母亲遇上交通意外，令她更觉亲情的可贵：“由细到大都好想保护爸爸妈妈同细佬，畀最好嘅嘢佢哋，妈咪有事嗰刻我唔喺佢身边，当时真系好无助，好好彩佢冇事，呢件事令我成长咗好多，更加珍惜同屋企人嘅相处时间！”
两年内买楼
这三年来，Rainky歌、影、视都试过，去年更进军商界投资饮食业，荷包进帐不少的她更以两年内买到楼为目标，但她未被名利冲昏头脑，反而学识静待时机：“以前我份人好心急，一味谂住几时会有更多人赏识我，但依家就学识咗放慢脚步，相信逐步逐步咁行，默默耕耘就会有回报，好似初出道时有人话过我似周秀娜，佢依家咁成功当然好戥佢开心，但我又会同自己讲要做到有佢咁嘅成就先叫掂，我一直都冇模仿对象o架，其实做好自己，每日过得开心就够啦！”
继续唱歌
百足咁多爪的她去年参演剧集《潮拜武当》，今年更会到内地拍古装剧《末代御医》，演出机会多多，她希望未来可尝试不同戏路：“依家拍戏拍剧好多时都系做细路女角色，未试过有感情线，其实我好想试吓做大人角色，如果有啱嘅角色，只要唔系裸露，我唔介意牺牲㗎，好似要我剃光头都肯，但公司话仲细，等多几年大个啲先做大人角色啦！”
五光十色的影视界的确吸引，但她亦毋忘自己的歌手身份，现正积极录歌拍MV于今年出新碟：“由始至终我都冇放弃过唱歌，希望大家知道我系歌手出身，我仲想23岁前可以开到个唱添！”
唔愿靠男人
Rainky事业发展稳定，但仍未遇到人生中的Mr. Right，狮子座的她却不会为拍拖而拍拖：“我系要爱情又要面包嘅人，依家有人追紧但睇唔啱，我份人好独立好硬朗，唔锺意靠男人，睇唔啱咪再等下一个，同埋我唔会因为有家庭就唔做嘢，我好锺意小朋友好想生BB，但又想有自己嘅事业，想样样都兼顾到，不过依家仲系单身，希望快啲搵到如意郎君啦！”
后记：埋位龙精虎猛
青春果然是王道，访问开始前，蔚雨芯透露自己工作忙碌，连休息时间都不多，加上在内地拍剧时吃得不健康，令皮肤变差，不过一埋位影相，21岁的她便即时变得精灵活泼，还落力地摆Pose，后生真系唔同啲！