陳若嵐重投娛樂圈　向歌手之路進發

六年前與尹蓁晞（Yumi）以孖妹姿態出寫真的模特兒陳若嵐（Melody），近年幾乎消聲匿跡，原來是煞停演藝事業專心讀書。現時Melody已修畢學士課程：「啱啱畢業，讀完個心理學degree，嚟緊可能讀個part-time master。」剛畢業的Melody亦離開舊東家，重投娛樂圈並不時上大陸搵真銀，銳意向歌手之路進發。

提到昔日拍檔Yumi，Melody說：「好耐冇聯絡啦！同佢個ex（前男友）陳偉成熟啲！有時搵佢剪頭髮！」她又謂有跟舊老闆及同門趙碩之聯絡。

曬得一身小麥色肌膚的Melody陽光氣息濃厚，更擁越南血統，外形十足鬼妹仔！她說：「我鍾意曬黑，感覺健康啲！不過有朋友話我好MK囉！因為我又啡色頭髮，又鍾意化濃妝。」熱愛化妝的她更早已修讀化妝師課程，果然多才多藝！