娛樂專題：林欣彤走出抑鬱　用傷疤救人

24歲「小巨肺」林欣彤（Mag）憑《超級巨聲2》一夜成名，後因面對巨大的壓力及愧對嫲嫲，突然患上抑鬱症。經過治療，她走出抑鬱症的陰霾，可惜又歷盡情傷兼傳出被虐打事件！傷痕增加，但多得這一切打擊，成就今天堅強的Mag，並有能力幫助遇到同樣困難的人。翻過一條又一條的樹藤後，等着Mag的正是一段非凡人生。

歌手林欣彤（Mag）2010年參加《超級巨聲2》奪冠，翌年正式進軍樂壇，星途看似一帆風順，但2012年卻突然傳出失聲、厭食暴瘦甚至患抑鬱症，一整年好像人間蒸發般。幸好，在家人及友人貼心照料下，經過一年的治療及休養，Mag成功擊敗抑鬱症，再戰樂壇，努力邁向其精彩人生。

Mag認為自己的人生沒甚麼機會後悔，除了對患腦退化症和中風的嫲嫲：「對住嫲嫲係點樣做一世都唔夠。」自覺愧對嫲嫲，加上沒有想過成為歌手後的衝擊如此巨大，令她鬱出抑鬱症來。

感激有過苦難經歷

「我覺得我喺度努力工作實現夢想，但偏偏嫲嫲瞓喺病床度，覺得太不孝，我唔應該再向前行一步又一步嘅花花世界，應該咩都唔做陪佢。加埋覺得入呢行原來係咁，冇咁大嘅心理準備，嗰陣比賽諗住喺台上唱歌唔使負責任，玩完就走，點知比賽完，第一、二日已經有好多記者，好驚，多壓力，人哋對你目光又唔同咗，開始覺得搵唔番自己，所以撐唔到。」談到患病期間曾想過自殺及寫過遺書，她自覺最恐怖是永遠都覺得很孤獨：「就算身邊圍住所有人，爹哋媽咪攬實我、細佬錫我、狗仔喺隔籬，我都覺得孤獨，係形容唔到咁孤獨。」

幸好現時能夠走出抑鬱症的陰霾，Mag坦言最感謝家人：「雖然嫲嫲喺我抑鬱症嗰陣已經講唔到嘢，但多謝佢養大我，令我諗番佢最想見到我開心。」她亦感謝戰友陳慧敏和許廷鏗的支持，並感激歌迷不離不棄。事後回想，Mag不諱言抑鬱症是一個大苦難，但同時亦是上天賜予的一份禮物：「令我堅強咗，發現到身邊好多人愛我，所以我係感激有過呢段經歷，同埋有啲前輩都話初初開始有呢個經歷係好，因為更加知之後嘅路點行。」

過來人Mag坦言現時懂得怎樣幫助同類人，曾有患抑鬱症的歌迷在微博跟她表示害怕，Mag憶述：「我同佢傾偈、鼓勵佢，希望令佢覺得我係同佢同行，令佢知道自己唔係不幸，只係個天要你學習，咁就一齊學。所以公開病情係一件啱嘅事，個天賜咗一樣經歷畀我，我又可以用呢個經歷去幫人。」

愛一個上一課　我好鍾意拍拖

Mag在感情路上跌過痛過，但仍渴望愛情，並體會到愛情是人生十分重要的一部分：「愛情係一份禮物，係好多好多嘅祝福，就算唔開心過，但再次起身遇到下一個或同一個人嘅時候，會令自己變得更加好，愛情係一個好大嘅課堂，係成世都要不斷咁上嘅一課。」自認以前拍拖大過天的她坦承人大了，不會再對對方有「中毒一般嘅依賴」：「依家最希望兩個人可以互相學習，會為對方諗將來，希望能夠互相真正地依靠。」渴望愛情的她更早已計劃婚後生活，她表示一定會生BB，最好一仔一女：「如果冇入呢行，我係諗住差唔多（結婚生仔）啦，依家24歲，諗住25、26歲要結婚生仔，但依家唔得，入咗呢行太難，連搵個拍拖嘅都未！」

理想對象四大條件

獨立的Mag表示不愛被人養，即使婚後仍會堅持工作：「如果要湊仔未必可以出嚟做嘢，但起碼要儲咗筆錢先，可以用嚟投資或搞吓小生意，咁就可以照顧埋小朋友，又唔使完全靠晒另一半。」可惜現時仍是單身，令她不禁高呼：「我都係一個好鍾意拍拖嘅人嚟，幾時都渴望愛情，但真係唔可以強求，如果唔係就盞煩，所以都係等吓。」她更列出理想對象的四大條件：對她好、專一、孝順和上進；各位符合條件的男士，識做啦！

Mag出道短短四、五年，已擁有像坐過山車般大上大落的經歷，問她怎樣總結這數年的經歷？她笑說：「『咄』一聲已經過咗，真係經歷咗好多嘢，好大嘅歷險，好刺激，好開心！就算人哋話呢行危險、複雜，但去到邊都複雜啦，我都搵到好多錫我嘅人，印證到你對人好，人哋就會對你好，總括係好開心。（入行後最開心同唔開心係咩？）最開心真係揀唔到，太多，識到好多好好嘅朋友，至於唔開心，唔緊要啦，唔揀，因為係冇㗎！」展望將來，Mag希望不再只是個人上有提升，而是希望藉音樂，為身邊人、社會，以至世界帶來好影響。

重拾舊歡　每次都儲更多唔開心

愛情，每個女孩都渴望，正值花樣年華的Mag亦不例外。自言拍拖次數五隻手指數得晒的她縱使受過情傷，甚至傳被前男友虐打，但一切傷痕已隨風而散，對於所有前度，她心存感激。

談到Mag的戀情，最為人熟悉除了與「巨聲幫」的羅孝勇（Sheldon）外，與傳出「家暴事件」的初戀男友Ben的一段情亦廣為人知。雖然早前有指初戀男友因疑似戴綠帽而虐打她，但事過境遷，Mag沒有流露對他的恨意，談到最長的一段情時，還主動提起對方：「最長唔係直接一拍拍到尾，係糾纏咗七年，由Puppy Love，跟住分開吓又一齊，期間大家試過同其他人拍拖，當中都會掛住對方，跟住又一齊過，對我24歲嘅人生嚟講，係好長。」她坦言每次再走在一起雙方都有改變，學懂怎樣珍惜：「但有一樣好無奈，就係每次都儲更多唔開心、儲咗更加多傷痕，可能我哋都係唔夠成熟，所以最後都分開。」

而這段糾纏七年的戀情，同樣地令她最深刻：「有時諗，第時結婚會點，結婚都會醒起呢個人，如果呢個人結婚我唔知會有咩感受，當然係會祝福嘅。（覺得新娘不是我？）哈哈，可能會諗埋好多嘢，但都希望佢安好。」問到可有機會再復合？Mag語帶保留：「咩都有可能，但隨緣啦！（接受翻撻？）戀情再次燃點唔係翻撻同回頭草咁差嘅字，對我嚟講，鍾意咪一齊。就算一齊過，唔覺得有咩原因係唔可以再一齊，因為大家會變，成長咗，可能嗰個係Right Person，但未必係Right Timing，兩個人成長後再遇番，原來係更加美好呢？」

點名多謝羅孝勇

至於跟Sheldon的三年情，雖然二人捱過Mag患抑鬱症的難關，但在2013年分手：「當時我哋兩個人商議，大家好和平咁覺得行番各自嘅路係比較適合，我哋嚟緊又有各自事業，都覺得（分手）對我哋兩個都係好嘅決定。」對於有指她在患病期間經常對Sheldon大吵大鬧，她笑言不知為何有人監控她何時發脾氣，但亦點名感謝Sheldon的包容：「就算係，都多謝，包括佢。當我病嘅時候，身邊人真係好錫我，佢都對我好好，身邊全部人，包括屋企人都比平時仲要付出更大力量，辛苦佢哋，正正因為呢個病，睇到邊個係好愛我嘅人。」

她又坦言對過去每一位前男友都心存感激：「無論結果係點完結，有唔開心完結、有試過和平，但都心存感激，都係造就咗依家嘅我，因為之前開心同唔開心嘅經歷都係變成咗依家嘅我，開心係令我更相信愛情、憧憬愛情同幸福，唔開心係會令自己更堅強，學識點樣更愛自己、改變自己令自己做得更好。」

後記：向好嗰方面諗

經歷過病魔、情傷、「家暴」等種種負面新聞，Mag現已煉成「不死之身」，堅強的她對任何事都好像有抵抗力，像是個「開心果」，甚麼都可以笑着樂觀面對，永遠都向着好的一面去想，積極正面的態度更像光源般，成功感染身邊人快樂起來！