梁思浩大呻辛酸史　為慈善犧牲頭髮

藝人梁思浩聯同李麗蕊、經理人Kawaii及資深娛樂記者菜遠等人，主持now TV 102觀星台節目《娛樂審死官》，大爆藝人開工時搵命搏。梁思浩說：「籌款節目有好多危險動作需要藝人『硬食』去做。記得有年有關慈善星輝嘅活動，監製同我講可以畀我獨當大旗，要求我將啲燃燒液體淋喺身上，畀捐款者再點火，叫我只要不斷向前走，啲火就會隨住風向喺我身後燃燒，衝過十道紙門後立即向前趴低，工作人員就會即時幫我滅火。當我猶豫之際另一位工作人員不斷話今次可以畀我威番次，情節有啲似騙案。」

梁思浩續說：「結果喺冇綵排下做出『火人過紙龍門』嘅表演，幸好我只係燒燶咗頭髮。不過呢個環節叫好叫座，第二年就換上張智霖（Chilam）表演『烈火焚身衝屏風』，雖然由十道紙門換上廿道紙門，但跑嘅距離實質一樣，事前Chilam都有打電話畀我取經。結果Chilam表演時，喺向前趴低嘅一刻猶豫咗，火從後回前，最後燒傷手。藝人條命就係咁賤，喺製作單位眼中根本唔值錢。」

梁思浩又指記得有次與鄭浩南拍攝一齣電影，二人爬上大廈外場的竹棚來避開警察圍捕，爬到十樓時會從高空墮下，雖然現場墊有大量床墊及紙皮箱，但沒有其他安全設施，他說：「我唔係武師出身，點解會應承做呢啲咁危險嘅動作？」

李麗蕊又述個人經歷：「我記得喺拍攝電影《學校風雲》時，受到劇組慫恿，張耀揚大力掌摑我嘅一幕假戲真做，不過佢嘅造形要戴滿戒指，配合埋強烈嘅力度，痛到我眼淚直流，反應真係由心而發，我個鼻即刻腫咗，原來係我個鼻骨被打爆，仲歪咗，傷勢好嚴重，要即時入院治理。」