娛樂專題：歐家裕感情穩定無懼緋聞

在娛樂圈要向外公布戀情絕不簡單，然而熱愛打排球的模特兒歐家裕大方承認銀行業男友的地位，更視男友為結婚對象，即使遇到緋聞亦冇有怕，互相信任最重要，So Sweet！

癮起落場周身傷

模特兒歐家裕（Joe）由中學開始便打排球，當時立志成為香港排球隊成員的她，由於疏於練習而慢慢遠離排球，今年排球癮起的她，加入由鄧麗欣組成的排球隊「Loey」。打了排球10年的Joe表示訓練及比賽中難免會有碰撞及瘀傷，故亦怕會影響工作：「着裙嘅時候隻腳瘀咗一大撻都幾尷尬，都會塗遮瑕膏，但其實打波打耐咗會唔記得錫身。」當然打排球亦令她自感手指是身體最不完美的部位。

星爺啟發幽默感

現職模特兒的Joe希望成為演員做打女，她說：「我本身個人活潑好動，而且有運動底子。」她又笑言從小到大的偶像是周星馳，對方說過的每句電影對白都深入腦海，啟發她的幽默感。做演員難免遇到性感角色，對於性感這個課題，她說：「性感可以好健康、好靚，最緊要係有美感，唔係話着得少就係性感。（試過最性感係幾時？）係露背拍沐浴露廣告，影沖涼，但前面貼咗乳貼同埋有着Tube。」

感情穩互相信任

提到感情生活，Joe不諱言與任職銀行業的男友感情穩定，更視男友為結婚對象，雖然男仔頭的她身邊有許多男性朋友，但只視他們為兄弟，亦謙稱不多人追。對於男友如何看待其模特兒工作，她甜笑說：「我哋都有傾過呢個問題，只要健康正面，冇不必要嘅性感都可以接受，佢都會尊重我，我鍾意啲諗嘢周詳嘅人，因為我諗嘢好簡單、唔複雜。」她又指與男友互相信任，不怕緋聞破壞他倆的關係。

愛助老人小動物

談到人生目標，Joe不希望將目標鎖死：「我想睇吓自己到底可以去到幾遠，而我好想用自己嘅知名度做善事，幫助老人家同小動物，因為『施比受更有福』！」

志願竟然係漁夫！

每個人在讀書時期都會寫一篇題為「我的志願」的文章，自小已喜歡畫畫的Joe回想當年想做畫家：「但我爹哋話做畫家賺唔到錢，之後我就諗住做漁夫，因為我以為做漁夫可以揸船環遊世界，哈哈！」她還自爆那篇作文取得全班最高分呢！