曾雨晴情迷單眼皮男

新人女歌手曾雨晴（Jody）曾推出歌曲《Love in Winter》，歌曲圍繞冬天的戀愛，不過她就坦言自己仍然單身，又不會選擇與圈中人發展：「雖然依家單身，不過都會有理想中嘅對象。一對情侶拍拖，最重要係大家真心鍾意大家，我個人都會比較長線，會想一齊計劃將來。我自己好鍾意單眼皮嘅男仔，高度我唔會要求太高，襯到我就得啦，我本身好鍾意吳彥祖嗰type！不過就唔會想同圈中人發展，本身我好鍾意去認識唔同職業嘅人，同一份工我會覺得冇咁特別，想見識多啲大家生活都會多啲新意！」

夢想入行做唱作歌手的Jody又曾試過開舖賣衫，她又謂如發覺自己不適合做圈中人會退居幕後：「如果我真係覺得自己唔適合入行發展，我都會繼續投入搞音樂，會去幕後作多啲歌畀唔同歌手，最想自己嘅歌有機會畀衛蘭唱，佢唱歌好有自己風格，係一個我好欣賞嘅歌手。」

她目標是出碟，有歌派台：「嚟緊想有自己嘅碟，就算單曲都好，都想首歌可以派到台，而電台dj同聽眾亦都鍾意。另外我都想試吓拍戲，角色方面我冇乜所謂，唔同嘅別我都想試，但古裝就會係最具挑戰！」

未有簽公司的Jody直言都找到伯樂：「我一直都想搵一間同我有共識嘅公司，會睇吓佢哋係咪真心肯花資源去栽培一個新人。而作為一個歌手，最緊要係佢嘅歌，所以點都好，我會好用心去做返我本份嘅嘢，做好嘅歌再唱好佢，唔會去怕圈入面嘅是是非非！」信心與決心都十足！