韓國留學　翟威廉做悶爆書生

無綫藝人男翟威廉（William）曾於日本留學，故操得一口流利日文，見近年「韓流」席捲亞洲，他亦跟隨潮流自我增值學韓文，因此，獲無綫睇中為旅遊節目《最瀛自由行》、《廉遊韓國》等擔任主持。早前，William偕黃翠如、韓國組合god成員安信源（Danny）等，拍攝劇集《7日羅曼史》時更充當翻譯。不過，謙稱水平未夠應付工作的他，最近趁空檔到首爾慶熙大學，「閉關」進修兩個多月，William說：「嚟到唔夠兩個月，我密集式咁一日返六個鐘，keep住講keep住聽，進步好大，但公司需要好勁，我依家仲未達標，打算返港繼續讀，年尾再考番個國際試。」

William表示同學們均來自世界各地，面對一般妹妹仔他更瞬間變成「喔巴（Oppa）」兼「悶爆書生」，他笑道：「呢度好多留學生都睇無綫劇，所以我到學校已經係個『景點』，但我年紀大佢哋咁多，唔係好啱玩，最主要都係同佢哋傾下韓文、講下讀書嘢，所以我喺呢度出咗名係個非常沉悶嘅人，每日淨係得讀書。」他又稱最開心有得考試：「年紀細唔鍾意考試，年紀大啲反而鍾意考試，等自己有啲目標考好少少，因為要趕拍日本節目，所以考唔到最尾個試，但考過中期試知道自己程度，呢樣暫時係我喺韓國最鍾意嘅嘢。」