娛樂專題：周海媚歷史變奏「七字成妃」

「不老玉女」周海媚（海味）最近憑內地劇《武則天》（內地劇名《武媚娘傳奇》）的威勢，再度在港活躍起來，劇中飾演一個在史書上只有七個字記載的隋朝公主兼唐朝妃子－楊淑妃，要掌握一個隋朝遺珠變作李唐寵妃的複雜心理，難度絕不下於范冰冰飾演的武則天。海味坦言扮演楊淑妃讓她過足戲癮，但她並不只滿足於幕前的掌聲，正計劃籌備開辦工作室，預告未來將會在製作方面大展拳腳，實行幕前幕後雙線發展！

愛情與仇恨角力

早在海味去年盛暑在內地趕拍《武則天》時，已引起各方注意，理由不完全因為網絡流傳的一輯「周海媚西瓜」性感圖片，更因為她演的是楊淑妃，一個在史書上僅獲「恪母，隋煬帝女也」七個字便「講完」的隋朝遺珠及李唐寵妃，世上大概只有用來形容畫家梵高的七個字「沒有人比他更窮」，更能表達出那份同等的坎坷！

海味坦言為演繹這個角色下了不少苦功：「楊淑妃出名好人，喺一大班攻心計嘅後宮當中，佢係個好Nice嘅人，不過佢係前朝隋朝嘅人，內心世界好複雜，因為李家王朝就係滅咗隋朝嘅人，而淑妃嫁咗畀滅國仇人李世民，後來佢嘅性格會有變化，會發展成想報仇、復國，從中引伸出好多故事！其實歷史上冇記載話真嘅淑妃想報仇、復國，不過我有另外做功課，了解吓嗰個時代嘅歷史。」

頭飾太重生血粒

雖然范冰冰曾對外表示不是每個女演員都能駕馭武則天一角，然而論角色揣摩之難度、內心複雜之變化，海味只有七個字供她研究，極考演員的基本功，當中的困難顯然易見。而海味也直言《武》劇拍攝辛苦，不過未算最甘：「拍攝期橫跨八個月，感覺好似經歷咗四季，但唔算係我從影以來最辛苦。2004年我試過連續拍兩套古裝劇，冇得抖，嗰次先叫辛苦！」

《武》劇的華麗頭飾極為重磅，令演員叫苦連天：「今次有好多好考究嘅頭飾，真係好重！冇人知道實質有幾重，但個個用手秤完都話唔輕，更何況我哋仲要頂住呢啲頭飾拍十幾個鐘咁長時間？壓到個頭有幾痛，你都可以想像到。天氣熱嗰排，個頭畀啲頭飾箍住，感覺個頭好似脹大咗咁，加上頭飾入面好焗，啲汗焗住，個頭又腫，一拍十幾個鐘，滋味都唔好受。收工一睇，發現個頭有好多腍腍哋嘅血粒，因為頭頂啲血管長時間畀嘢壓住，起晒枕，雖然唔係太痛，但一個個血粒都得人驚啦！我冇去睇醫生，靠按摩去散咗啲血粒。」

海味不諱言曾辛苦到想「劈炮」：「拍呢個劇我都試過話：『咁辛苦嘅！啲頭飾又重，又搞到個頭咁痛，點解要咁辛苦呢？拍埋呢次古裝，我以後都唔拍古裝喇！』不過個腦入面呢頭閃過呢個諗法，嗰頭工作人員一叫：『周海媚埋位！』我又即刻忘記晒啲辛苦嘢，成個人又精神番晒！其實好多演員都會口講話辛苦，但只要一埋位，佢哋又會即刻表現番專業水準，況且我由細到大性格都係男仔頭，份人好樂觀，加上咁多年來拍戲，都習慣咗樂觀面對一切。」

領口愈低愈尊貴

海味自言性格男仔頭，習慣樂觀面對一切轉變，那麼，她用心演出的劇集被剪成「大頭娃娃」播出街，又是否她所喜聞樂見？她說：「起初劇組搵我演呢個劇，我都知道服裝嘅尺度，我OK！因為我未演過唐代嘅故事，所以好有興趣、好想參與。其實劇組參照咗好多大唐歷史資料去製作服裝同髮飾，喺唐朝嘅文化入面，愈尊貴嘅女子，領口愈低。我哋製作咁有誠意、咁認真，啲燈又打得靚，仲有我哋演出時都有好多肢體動作，例如手嘅擺放，我喺現場拍完睇Playback都好鍾意，觀眾睇唔到會好可惜，但冇辦法啦！（『加工背心版』令你哋心血不致白費？）我冇睇過加工背心版嘅效果，但喺網上睇過啲相，都OK，幾自然。」

順逆中看透世情

《武》劇有一句對白：「順境看不出人心，逆境才能！」這是後宮妃嬪置身於勾心鬥角的漩渦中，對世情的觀察。然而，一個人在經歷順、逆境時所展現出的氣度與堅忍，也能反映出一個人的能力和層次，海味示範了遇到困難與挫折，不怨天不尤人的高尚情操：「我入行初期都好順境，嗰時我傻更更，做人冇一個特定嘅目標，冇話要做到咩位置，就連選美都係我爹哋幫我遞表格參加，點知好順利就入咗圍，雖然落選咗，但好順利又入咗TVB拍嘢，做咗幾個自己都好深印象、好鍾意嘅角色。不過講到低潮時期，我諗應該係我喺TVB嘅合約完咗後，我簽咗畀電影公司嗰段時間，嗰兩年我零收入，因為嗰間電影公司竟然一套戲都冇開畀我，日子都幾難過，加上我嗰陣已經有人識得、認得，又租咗個地方住，試過最困難嘅時期，我有兩個月差啲交唔到租，好彩只係差啲啫，到最終都搞得掂，唔使冇地方住。」

機會留給有準備的人

但海味絕對沒有守株待兔，她伺機向電影公司提出解約，開展另一片天地：「到後來我見間電影公司都冇工作安排畀我，我咪主動向公司建議不如提早解約，之後我就過咗台灣發展，拍台灣電視劇，仲去埋日本影寫真，又嘗試出唱片，發展都幾唔錯。我冇回想番當日電影公司點解簽我返嚟又唔開戲畀我，到依家我都唔知係咩原因，可能係我份人太直，當時又太細路女，又或者公司覺得冇適合我嘅戲，又或者我唔夠成熟，總之依家睇番，就係人總會有高潮、低潮，如果唔係呢段經歷，我都唔會過台灣發展，拍咗好多好受歡迎嘅電視劇，連帶我後來喺內地都大受歡迎，更加唔會可以去到日本發展！所以，我認為做人應該不斷學習，我好少諗番以前，因為我覺得人係應該向前看，每個階段經歷嘅事件都係成長嘅一部分，人會不斷遭遇唔同嘅事，令你不斷成長，更新自己！」

入行30年的啟示

海味最新一個「更新自己」的計劃，是嘗試一項她從未涉足的範疇：「今年係我入行30年，我覺得自己喺呢30年得到好多，有好多唔同嘅經歷令我有所改變，由純真、乜都唔識嘅女仔，慢慢改變、學習，漸漸搵到自己嘅方向，我覺得應該做到老學到老，唔同階段要學唔同嘅嘢。」她滿腹大計：「嚟緊我唔想再喺幕前咁辛苦，我籌備緊開一間工作室，希望將來可以放多啲時間喺幕後工作，我想學多啲製作方面嘅知識，幕前我要遇到好劇本至會拍。（見范冰冰做幕後賺逾億，想一試自己實力？）我對金錢觀念唔重，只係想去做製作，我預計2016年我嘅工作室就會有作品同觀眾見面。」

後記：感激粉絲追隨多年

經過那些年，順境的、逆境的，海味一一走過，30年來最讓她珍視的始終還是一班忠心粉絲：「我啲Fans叫做『海豚家族』，早前我喺上海同『海豚』做咗個粉絲見面會，慶祝我入行30年，我仲出咗隻EP，裏面有2首歌，呢隻EP唔會公開發售，因為純粹係我畀愛錫我嘅歌迷、影迷做個紀念。我班Fans支持咗我好多年，知我喺出面拍戲，可能飲食都唔好得去邊，佢哋會帶埋我鍾意嘅食物嚟探我。記得有年端午節，佢哋知我喺外邊拍戲，冇得同家人慶祝，於是佢哋叫佢哋媽咪包咗啲粽，然後千里迢迢帶嚟探我，同我慶祝！」那她開設製作公司、減少幕前演出，不怕粉絲難過？她說：「我雖然有計劃減少幕前演出，但唔會減太多，一年希望都有兩個作品面世，總之我唔會掛住做幕後工作，而完全消失喺幕前！」

那些年，我的經典重現！

48歲的海味演過不少經典電視角色，無論80前、80後，都被其楚楚可憐的形象俘虜。而海味亦有最愛的角色，當中有的性格與她相近，有的與她大相徑庭，有的影響了她的人生，有的甚具挑戰，就讓我們一起來回顧這些角色！

《回到未嫁時》楊八妹　樂天知命

「楊八妹性格樂觀，有大無畏精神，同我真人本身嘅性格好接近，所以我演起嚟都好舒服，好鍾意呢個角色！」

《倚天屠龍記》周芷若　演技突破

「周芷若係《倚天屠龍記》一個好重要嘅角色，佢除咗令我喺內地好受歡迎外，亦令我喺演出上有所突破！」

《武則天》楊淑妃　面慈心險

「我好少演反派角色，可能因為大家都認為我個樣點睇都唔似壞人，所以當我接到呢個角色時，我覺得好有挑戰性，可以畀我有戲可演！」