電視城百人混戰　谷胸心悠鬥高挑Charlie

將軍澳電視城昨日舉行首輪面試《2015香港小姐競選》，各參賽者佳麗會見無綫高層樂易玲、余詠珊及監製陳旭亮等評判。面試由下午開始，吸引逾130名參加者，更要於首輪換上泳裝示人！雖然今屆的參加者質素平平，但當中不乏高質靚女，更有醫生、碩士及劍橋大學法律學生，憑學歷拉高參賽者水平！不過最標青的要數現年23歲的「高挑Charlie」Louisa，穿上連身裙的她氣質清純，配合甜到漏的笑容，似足「玉女」楊采妮！

以一身碎花Look示人的「港版秀智」Jessica雖然不時挺胸收腹，擺出戰鬥格，惟因腋下有少許污漬而大打折扣！染有一頭金髮的「密實娜姐」Ashley雖然「MK」味濃，但其開朗笑容亦為她扳回不少分數！而「素顏凱琳」Slivia無論樣貌定身形，皆似足前港姐冠軍陳凱琳！「弗版楊洛婷」Mandy身形高挑，加上一身小麥膚色兼大方露腹肌，夠晒時尚性感！「翻版朱晨麗」Karmen及「長髮妍希」Kianny則勝在大方得體、身材勻稱。最性感的則非「谷胸心悠」Celine莫屬，以吊帶裙登場的她谷行5吋事業線，影相時更有意無意鞠躬兼夾胸，而任職眼科醫生的「激凸醫生」Sunshine，雖然擁有「Big」爆上圍，但身穿貼身裙的她身形較為健碩，更意外凸腩！

港姐競選統籌經理余詠珊受訪時表示，今屆收到逾千份申請表格，比預計的200人多出幾倍，惟她坦承質素參差：「好嘅就好好，有啲就學歷同背景都好。」由於韓國受到「新沙士」的疫情影響，原本有意安排港姐到韓國受訓的無綫，惟有將地點轉為日本東京：「我哋同緊日本知名嘅Model Agency傾緊，會搵Top Model同大粒嘅電影明星，因為臨時改地點有啲倉卒，所以會將受訓時間濃縮到一星期。」據知經過第二輪面試後，無綫將會從中揀選16人入圍。