老闆阿Bob傳被雪　鄭融無留意

藝人楊思琦與歌手鄭融日前到元朗拍攝有線節目《寵物ER》，接替吳綺莉擔任主持工作的思琦，不怕外間將兩人比較，她說：「節目嚟到第三輯，有唔同嘅環節，內容同嘉賓，公司有畀啲參考我，但喺主持風格上冇規範住要點做，可以好自由！」

思琦妹又謂暑假不會帶女兒外遊，她說：「佢仲忙過我，上好多暑假班，安排唔到旅行，但之前我拍內地劇兩、三個月，呢輪多啲留港陪佢。」對於「無綫福將」歐陽震華（Bobby）續約引發風波，思琦妹說：「我同Bobby合作過，諗番我當年傾續約時，都冇咩難受或者尷尬，公司（TVB）對我好好，只係我想出去闖吓、學嘢。其實Bobby咁有演出經驗，去邊都有好發展，唔使唔開心！」

鄭融則稱與失去左前肢的狗隻阿強很老友，她說：「我係保護遺棄動物協會教育大使，阿強係我拍檔，我哋要去中、小學做分享。（為佢冇咗前肢心痛？）呢度好多動物都有慘痛經歷，但佢哋喺度有得住、有飯食，都戥佢哋開心，希望多啲人對動物有愛心！」

她又透露今年內會出8隻新歌，對於有指其唱片公司老闆之一林盛斌（Bob），因身份尷尬，而被下「冷凍令」，暫時減少在無綫出鏡頻率，以免被指有利益衝突，鄭融說：「我冇留意，但傳啫！（想佢做幕前定擺多啲時間喺公司多啲？）我冇權話想佢做邊樣多啲，佢係我老闆。」