少女標本談情史　為事業犧牲愛情

四位美少女許雅婷（Kabby）、袁紫僑（CoCo）、溫心及簡淑兒組成「少女標本」殺入樂壇，可是她們踏上華麗星途後，情路不約而同開始出現分岔口，為了成就星夢，最終被迫犧牲愛情，忍痛與男友斬纜！

她們各人先度身訂造推出單曲，打正旗號賣青春，CoCo的《幾百萬分之一》講述一個忠於自己的女孩，為了愛人可以不惜一切：「因為鍾意嘅人可能係幾百萬人入面先搵到一個，唔會人哋話唔好鍾意就會唔鍾意，呢個性格同自己差唔多，細個覺得自己任性，大個發覺其實都係種主見。」

可惜再有主見的女孩，終究也有心軟的時候，CoCo其中一段戀情遭到家人大力反對，最終痛斷情根：「最後個結果唔係咁好，但諗番起都會有回憶，可能因為工作方面，屋企人覺得我唔好拍拖，應該專心做嘢，依家大家總算分開喺唔同地方努力緊。」

想不到Kabby也經歷過一段淒美愛情故事，就如新歌《人魚之丘》一樣，講述人魚愛上人類的不可能愛情，她說：「好似自己上一段感情，我記得錄音時都諗起番個故事，情緒好波動。當時我同男友背景相差好大，大家工作唔同，佢屋企人唔贊成我做呢行，咁佢好重家庭觀念，最後都『Let it go』，將傷心心情寄情喺歌，希望佢聽到。」

同是天涯淪落人，溫心的初戀也遭舊愛家長棒打鴛鴦：「我首歌叫《剛剛》，就冇佢哋啲歌咁慘，有啲似少女版兒歌。但我之前有一段戀情有啲似Kabby遭遇，係我初戀嚟，對方比較傳統，佢父母唔鍾意女仔拋頭露面，所以就分開咗。」