割瘤後康復進度良好　趙學而：食得瞓得

歌手趙學而出席環保活動呼籲拒絕買賣象牙，久未露面的學而表示於年頭動刀割子宮肌瘤，一直休養至今：「康復進度良好，朋友見到我又話我瘦咗，塊面又凹咗喎，但其實我體重冇變，食得瞓得，但見咁多朋友咁講，覺得係時候又要去Check吓。」

她表示一向關注生活健康，可能幾年前因拍劇過度操勞致病：「拍劇會Chur得好勁，加上女性過咗25歲後機能會衰退，都市人又成日有壓力。」學而透露醫生指切除子宮肌瘤後不會影響生育能力，但有機會復發。

冇物業喺手　租屋更自在

提到現時不少年輕人以置業為目標，學而表示：「我覺得二十幾歲嘅可以租吓樓，過吓啲自己照自己嘅生活先，我細個出嚟做嘢都係租樓先，水電煤、洗衫呀，好多日常生活嘢要處理，到有能力先考慮吓買樓囉。」

問到現在可有物業揸手，學而耍手擰頭說：「自從負資產之後就怕咗啦，依家冇物業，租樓仲開心，可以揀唔同區，覺得邊度舒服好住，又可以搬，有選擇嘛。」