網民熱話：周星馳金句重出「江湖」

無綫深宵時段重播嘅神劇《大時代》帶起咗全城深夜煲劇潮，隨住呢套神劇尋晚大結局，你以為有得抖吓？錯了！嚟緊星期一晚接「丁蟹」棒，喺無綫「夜夜一煲劇場」播嘅劇就係1989年嘅《他來自江湖》！呢套劇由萬梓良主演，兼有周星馳及吳孟達呢對之後喺電影圈合作無間嘅孖寶，令整齣劇笑料百出，當年此劇更加係無綫22周年嘅台慶劇，睇嚟大家又要捱夜追劇喇！

有周星馳嘅地方，就會有金句！喺《他來自江湖》中，飾演「何鑫淼」嘅周星馳笑騎騎咁講：「先生幾多位？Mark開邊條仔？」、「恭喜！恭喜！你老竇有喜！」同埋「搵人唔好搵外表，拍拖至好搵隻蕉！」呢幾句，唔知會唔會被翻炒做潮語呢？另外，劇中為「何家太極拳」師傅嘅吳孟達，一聽到《將軍令》就會立即耍「何家太極拳」，周星馳成日有意冇意哼《將軍令》旋律整蠱吳孟達，認真搞笑！

而《他來自江湖》嘅大結局亦好有睇頭，講到周星馳同「甩頭芝」（梅小惠飾）畀澳洲黑幫挾持時，梅小惠陰差陽錯畀周星馳同黑幫扑到頭破血流。當小惠要求周星馳負責時，周星馳話：「如果冇人要你，我要你囉！」講完心知不妙嘅佢即補飛：「我話如果冇人要你，我先至要你！」點知小惠話：「你放心啦！我冇人要㗎！」兩人一唱一和，令人印象深刻！

由於《他來自江湖》同劇情沉重嘅《大時代》好唔同，所以一眾「電視精」網民都話臨瞓前終於可以輕鬆吓！又提議遲吓可以播埋周星馳成名作《蓋世豪俠》，劇中周星馳嘅口頭禪，好似「坐低飲啖茶，食個包」，「你講嘢呀？」及劇中嘅地方名「段古母辛府」（斷估冇辛苦）等都成為咗香港人嘅口頭禪！仲係唔捨得慳妹瞓咗唔識醒？過咗個周末，星期一就開心笑啦！

網民有話兒：

肝xx：他來自江湖真係好睇！

xx仁：我買左（咗）套碟收藏！

一xx：唔知點解，周星馳講嘅對白吸引力好大，同一句對白由其他人講個效果會差十幾　廿皮，有時佢講嘅野（嘢）明明係十分之離譜同誇張，但同時又帶住一種唔到你唔信既（嘅）真實感，我覺得呢d（啲）就係周星馳嘅魅力！

霧xx丈：星仔同達叔真係冇得輸。

王xx：終於可以笑住訓（瞓）啦！