網民熱話：麥浚龍新MV deep到冇人明？

「試圖再努力愛也顯得不自在～耿耿於懷從前的愛～」麥浚龍代表K歌之一《耿耿於懷》，相信大家都耳熟能詳，前奏一起，唔少「獨」男都應該傷心往事仍在心頭！呢首K歌Loop足十一年，今年一月，麥浚龍以伍樂城同黃偉文嘅原有班底創作出《耿耿於懷》下集《念念不忘》，唱出「其實只要～讓我耿耿某人～思憶早閃閃發光」回應上集，表達男人老狗經過十個寒暑都死守回憶。

相隔五個月，終都推出《念念不忘》嘅MV啦喂！摯愛麥浚龍式頹廢唱腔嘅大班網友立即欣賞大作，點知意見兩極化，有人狠批睇唔明，亦有人「直豎拇指」讚勁有藝術感。其實成個《念念不忘》MV同十年前《耿耿於懷》MV一樣，都係以一鏡到底拍攝，不過萬眾期待嘅吳日言友情客串就冇喇，石板街場景都冇咗，只有麥浚龍One Man Band拍攝，喺MV入面全程戴住墨鏡、裝扮又有幾分似《這個殺手不太冷》嘅Leon，而畫面就玩Lighting，時暗時光。

睇足近五分鐘色調黑炆炆、灰過太空灰嘅MV，有網友就狠批「好嘢！全程夠膽死得個人企喺到，個MV應該係講佢晚晚瞓唔着覺，已經痴咗線」、「做乜？定還是我呢啲凡夫俗子睇唔明？」當然都有網友Like爆，從其他人看來既乏味又低成本製作嘅MV中領悟到另一境界，有自言懂藝術嘅網友大膽提出「我估係講分手後一直活喺前度嘅陰影下，記憶不斷若隱若現。」嘩！果然世事都被網友看透！唔打緊喇，藝術嘅嘢大家未必識，言之成理即可。唔鍾意個MV的話，不妨試吓網友建議：「大家最好都係合埋眼睇」好深奧，但可以一試。

網民有話兒：

英雄XXX：咁樣拍都得？好嘢！全程夠膽死得個人企喺到，個MV應該係講佢晚晚瞓唔着覺，已經痴咗線

longwXXXX：藝術嘅嘢你識條鐵！其實各位細心留意吓鏡頭係慢慢zoom out緊，講緊係嗰種不知不覺愈嚟愈遠嘅感覺。總知雖然成個MV睇落幾hea咁，但其實好花功夫，唔信你拎部相機試吓慢慢以唔係好覺眼嘅速度zoom out

古亞XX：做乜？定還是我呢啲凡夫俗子睇唔明？？我寧願你喺石板街行吓算數，仲要黑炆炆，發神經！

搏口冷XXX：一鏡到尾嘅MV，個mv其實係留畀有故事嘅人，全個畫面幾近全黑又有朦朧光線，營造合上眼又少少想擘大嘅感覺，令你回想起同果個人相處嘅片段，我建議大家最好都係合埋眼睇

紅毛毛XXX：我估係講分手後一直活喺前度嘅陰影下，記憶不斷若隱若現，中段光咗一陣， 比喻以為自己諗通咗，放得低，但最後都係念念不忘 :) 我係咪認真咗？