網民熱話：被消失的「江湖」對白？

神劇《大時代》播完喇，緊接落去嘅深宵劇係由一代笑匠周星馳主演嘅《他來自江湖》做接力。經典喜劇翻播，當然例牌成為網友焦點，仲一路睇一路喺討論區推Post到完場！

《他來自江湖》第一集，開頭播出由譚詠麟主唱嘅主題曲《明天仍要繼續》，「沒有去試過～怎知它錯～就算我錯了～亦必須繼續」，音樂一起即令網友大呼懷念，要跟住電視機唱番兩嘴。梗係啦，喺《大時代》晚晚聽完譚詠麟唱《我的生命我的愛》點會夠喉，依家又有機會繼續欣賞校長嘅金曲喇！

不過記憶猶如資料庫嘅網友就聲稱第一集《他來自江湖》，出現片段被cut嘅情節！當中有一段就係周星馳同潑婦路人「開拖」，皆因潑婦路人笑毛舜筠大熱天時着大褸，令周星馳出口為毛舜筠辯護，仲鬧爆潑婦路人：「係咪想我炳鑊你甘，甘都冇咁甘吖！死笨橙～～～～～」網友仲大感不解，話不如將播放時間改喺兒童節目時段，同時亦有網友指深宵時段細路仔都瞓晒覺，加上「死笨橙」亦唔算兒童不宜。

另外，又有網友話「何鑫淼」搞到自己笑到gap gap聲，怕嘈親屋企人，之不過部分口味唔同嘅網友，就話《他來自江湖》係輕鬆小品，同劇力萬鈞嘅《大時代》有好大分別。劇集內容有辣有唔辣，任君選擇，兩套劇風格都唔同，有網友睇唔慣都好正常啫！

網民有話兒：

XXXXXChan：咁都cut？不如放喺兒童節目時段播啦...死笨橙都唔出得街...

飛鳥XX：睇成晚都未帶出個主題出嚟

XXXXYYO：主題咪就係天哥原本係黑社會大佬，第一集都算交代晒啲人物關係啦

隱世XXX：呢D家常輕鬆小品,，梗係唔可以同大時代劇力萬鈞又緊湊咁比啦，唯有睇多幾集睇吓追唔追

茶漬飯XX：明天仍要繼續，呢首歌我日日loop