粉絲提前慶生　姜敏赫笑晒口搭膊回禮

韓國人氣男團CNBLUE成員姜敏赫現身銅鑼灣出席英倫品牌專門店的開幕派對，眾粉絲為目睹偶像Oppa一面，早已企滿廣場兩層。姜敏赫一出場，全場粉絲即用韓文大喊「Oppa，我愛你！」姜敏赫亦都非常識做，不時對粉絲微笑揮手。

本月28日生日的姜敏赫，粉絲們更為幫偶像提前過生日，不時用韓文講「生日快樂！」又用韓文大唱生日歌，姜敏赫明顯受落，不時笑笑口揮手感謝粉絲。另外，品牌早前舉辦了抽奬活動，有20位幸運兒能和Oppa合照，並能從偶像手上拿到簽名紀念品。合照時，姜敏赫主動搭着粉絲的膊頭，而粉絲則攬實Oppa條腰，令粉絲非常開心。

姜敏赫沒有接受傳媒訪問，只是在台上與主持交流，而在活動上亦發生小插曲，主持居然將姜敏赫的名字讀成「姜敏浩」。對於出席是次開幕活動，姜敏赫坦言既開心又榮幸。大會更即場拿出格仔布鞋畀姜敏赫分享襯衫心得，他接過鞋後即表示：「雖然好色彩繽紛，但好簡約，可以襯簡約嘅衫，着牛仔褲都好睇。」而當大會將一隻粉紅色沙灘涼鞋交到同場的名模樂基兒（Gaile）手上時，姜敏赫即大讚Gaile和手上的鞋好靚。