《東網巨星》Facebook隆重登場

20150620
東網電視
更多新聞短片
為咗熱烈慶賀《東網巨星》facebook隆重登場,《我愛發哥》全集將一連八日keep住放送,夠晒一氣呵成。
《東網巨星》facebook經已隆重登場!為咗配合呢個大事件,《東網巨星》facebook由聽日開始,將會一連八日、每日把三集視頻上載facebook,務求一次過晒冷《東網巨星》特備重頭節目《我愛發哥》,等大家可以喺短短一個星期,一氣呵成重溫25集精彩內容。
《我愛發哥》嘉賓粒粒巨星,包括容祖兒、陳奕迅、周秀娜、謝安琪、吳若希、黃翠如等,想睇佢哋同發哥點樣妙問妙答,發哥又點樣冧掂各大偶像同施展佢嘅幽默大法?咁就真係萬勿錯過喇!
重點報道各大娛樂新聞及八卦消息嘅《東網巨星》app,之前為大家獨家足本放送戴夢夢剝裙露底出「股」惑太極鼓神轟動全城,而《東網巨星》facebook亦秉承唔爆唔做精神,實時為大家八盡全城至hit至爆娛樂熱話,更為大家捐窿捐罅搜羅奇趣妙聞。
除咗晨冰戀、祥青戀呢啲轟動性嘅娛樂新聞外,林盛斌玩針灸驚變「恐懼鬥室」,同陳喬恩潮玩鎖骨裝雞蛋呢啲得意奇聞,《東網巨星》都會為大家詳盡報道,每日一睇,包你唔驚同朋友冇話題,立即到《東網巨星》facebook專頁,給我們一個like啦!
《東網巨星》facebook網址:
歡樂時光過得特別快,《東網巨星》特備節目《我愛發哥》完滿謝幕,25位紅星為慶祝「神級影帝」周潤發登「六」,隔空與發哥吹水,每一幕畫面,每一個神回覆,每一聲致敬...永留大家心坎中。最後一周金句繼續子彈橫飛,如果仲有嘢想問發哥?學佢話齋一年半載未定,五年十年又未定...所以想發哥金句陪住你?就要去《東網巨星》facebook睇片喇!
發哥精警語錄
第21集 周秀娜
女神周秀娜勁落鞋油讚周潤發型英帥靚正之餘,原來佢鍾意發哥原因竟然係:「我鍾意發哥佢會去買餸,好親民,同埋會搭地鐵(港鐵)!」由於買餸同搭港鐵都係平常事,周潤發聽後都忍俊不禁,仲問周秀娜係咪愛得太濫:「喂!香港廣大市民都好鍾意搭地鐵(港鐵),個個都去買餸喎!你都鍾意晒喎娜姐!」想娜姐鍾意,大家要買多啲餸喇!
第22集 任賢齊
小齊一直奉周潤發為偶像,仲希望請到發哥去睇自己做導演嘅戲,發哥即時搞gag反話小齊:「你幾時首映呀?套戲叫咩名?恭喜你做咗導演!點解你做導演都唔搵我呀?」而小齊就咁樣拆發哥彈:「我拍套戲叫《我的澎湖灣》,如果有機會我呢套戲賣得好,我賺多啲錢,應該就可以請到發哥做我哋嘅主角喇!因為下一套戲係江湖片,我要向《英雄本色》致敬,我要拍我嘅傷心太平洋,發哥可唔可以做我大佬?」
第23集 文詠珊(Janice Man)
當「宅男女神」JM讚發哥親民時,周潤發又係神回覆,隔空教JM改英文名:「咁你改吓個英文名啦!改英文名就得喇!你姓文㗎嘛!改做『Chan Man』咪親民囉!改咗個英文名,以後你就係『親民』囉!人哋叫你『文親』?唔係!你話我係『親民』,『Chan Man』!」咁JM以後咪要叫「CM」咯。
第24集 黃美棋
美棋BB細細個拍戲儲埋好多偶像合照,但就一直野生捕獲唔到周潤發,不過發哥就話被野生捕獲都有苦處:「講開又講,我呢,又唔係人又唔係畜牲,變咗通緝犯,有鬚嗰啲呢,有個榜通緝,做咩搞成咁,我依家要蒙面,我好似參加咗恐怖組織咁,唔見得人,又好似塊面爛晒咁,唔知邊個搞呢單嘢出嚟,搞到我人唔似人,鬼唔似鬼,動物又唔似動物,禽獸又唔似禽獸,通緝犯又唔似通緝犯,叫苦連天,你唔好搵我喇!」其實發哥高大威猛,就算佢蒙咗頭,都會畀人認得囉!
第25集 容祖兒
樂壇天后祖兒勁有自信話約周潤發到鳳凰山之顛,仲話:「睇日出吖,我哋影相吖,跟住再食早餐,約定你!」點知發哥就請祖兒食咗半個檸檬:「姐姐,上鳳凰山要過夜喎!嗰度地方得丁屎咁大間屋仔!我哋兩條友落去,我諗唔夠瞓!但如果你話我同你上去又唔好啦,同埋龍哥(劉浩龍)逼埋落去又逼到爆,你哋兩個去,我帶你哋兩個去一次,六點幾上到去之後我就走先,你哋就睇日出,我就唔睇喇!」發哥呢招成人之美,掂喎!