視Rain為目標　龐景峰變臉回歸攻韓流！

郭秀雲與前夫錢小豪的兒子龐景峰（Andrew）早前獲韓國公司睇中成為歌手，Andrew在20多名韓籍工作人員陪同下，飛回香港預備與人氣女團After School前隊長嘉熙拍新MV。一行人先到香港著名設計師何國鉦工作室揀戰衣，郭秀雲則全程在旁打點，而Andrew表示自己的目標是像韓星Rain一樣。

為迎合K-POP市場，Andrew的形象及外觀與過往明顯有差別，但他揚言對整容非常反感：「公司冇叫我整容，只係叫我減肥。（有冇諗過？）冇。（如果公司要求呢？）冇諗過，唔想！好多朋友唔知我簽咗公司，話睇完造型照覺得我整容，我有解釋過，因為每朝七點要起身訓練，一定會瘦！」他又透露很欣賞嘉熙，指錄音時經常獲對方提點，私下兩人也十分要好。

郭秀雲尊重決定

提到父母因其簽約一事引發不和，Andrew表示會做和事老，稱曾向父親提過會做歌手，亦嘗試致電他，但暫未獲回覆。郭秀雲則坦言不想做星媽，因Andrew絶對有能力可以獨立發展，並不需要事事也依靠母親：「我記得佢小時侯，大約四歳時，全香港記者圍住佢（因與前夫錢小豪婚變消息），佢好鎮定同我講話得，佢自己可以傾！」

而提到因Andrew簽約一事，與前夫錢小豪再掀恩怨，Sharon坦言不會感到生氣：「冇話嬲！得啖笑！（仲係覺得係小豪放料？）好大可能係，因為相唔係咁多人有，但亦可能係誤會。（Andrew話做和事佬？）事情都過咗去！（考慮同小豪溝通番？）愈描愈黑，我同佢都成20年前嘅事，我唔當佢衰人佢唔當我衰人！」

與郭秀雲份屬好友的何國鉦則表示：「同Sharon識咗好多年，知Andrew初初入行咩都唔識，都希望可以幫到佢，自己啱啱又推出咗男裝系列。（整咗幾多套戰衣？）八套，其實Andrew身形瘦咗好多，睇住佢大，以前好多肉同好大隻！（籌備幾耐？）都個幾月！」Dorian又表示同時亦忙於籌備男裝系列時裝騷，預計於七月在香港舉辦，故工作排得相當緊湊。